ଘର ଚଟିଆ

ଘର ଚଟିଆର ଘରକୁ ଦେଖିଲେ

ଲାଗେ କେତେ ମନୋହର ।

ତା କୁନି ଘରକୁ ଭାଙ୍ଗିବାନି କେବେ

ଭାଙ୍ଗିଲେ ହୋଇବ ଜର ।।

କେତେବେଳେ ଅଣ୍ଡା କେତେବେଳେ ଛୁଆ

ଘର ଚଟିଆ ସଂସାର ।

ସକାଳୁ ସକାଳୁ ବସାରୁ ବାହାରେ

ଆଣିବା ପାଇଁ ଆହାର ।।

ଘର ଚଟିଆର କିଚିରି ମିଚିରି

ଶବଦ କେଡ଼େ ମଧୁର ।

ଏକୁଟିଆ ଯଦି ଥିବ ଘରେ କେବେ

ଲାଗେ ନାହିଁ ଟିକେ ଡର ।।ଗାଆଁରେ ସହରେ ସାହି ପଡ଼ିଶାରେ

ଥିବ ଯଦି ଚାଳ ଘର ।

ଘର ଚଟିଆର ବସାକୁ ଯା ଆସ

ଲାଗେ ବହୁତ ସୁନ୍ଦର ।।

ଆଜିକା ଯୁଗରେ ସବୁଆଡ଼େ ଖାଲି

ମାଳ ମାଳ ପକ୍କା ଘର ।

ସେଥିପାଇଁ ପରା ମିଳୁନାହିଁ ଦେଖା

ବସା ଘର ଚଟିଆର ।।

ସୁନ୍ଦର ଜୀବଟି ମନଲୋଭା ଭାରି

କର ସଭିଏଁ ଆଦର ।

ନ ହେଲେ ନିଶ୍ଚିତ ପାଇଯିବେ ଲୋପ

ଅଜଣା ହେବ ସଂସାର ।।