ଘୋଷୁଛି ଆଜି ବି ଧରା

ତୁମଠାରୁ ବଳି ବୁଦ୍ଧିଆ ଠାକୁର

ଏ ସଂସାରେ ଅଛି କିଏ ,

କ୍ଷଣିକ ଭିତରେ ଚଉଦ ବ୍ରହ୍ମାଣ୍ଡ

ବୁଲି ଆସିଥିଲା ଯିଏ ।

ଉଦରଟା ତୁମ ଜ୍ଞାନର ଭଣ୍ଡାର

ମଗଜରେ ବୁଦ୍ଧି ଭରା ,

ଉପଯୋଗ କଲ କେଡ଼େ କଉଶଳେ

ଘୋଷୁଛି ଆଜି ବି ଧରା ।

ପିତା,ମାତା ସାରା ଜଗତଠୁଁ ବଡ଼

ସବୁରି ନମସ୍ୟ ଅତି ,

ବୁଝେଇଲ ପରା ଜଗତବାସୀଙ୍କୁ

ଘୁରି ତାଙ୍କ ଚଉକତି ।

ଆପଣା ଜ୍ଞାନ ଓ ଗୁଣ ଭଣ୍ଡାରକୁ

ଖୋଲି ଦେଲ ବିଶ୍ୱ ହିତେ ,

ସାଧନା କରିକି,ସାଉଁଟି-ସାଜିଲେ

ଜ୍ଞାନୀ,ଗୁଣୀ ଜନ କେତେ ।

ବିଘ୍ନହର୍ତ୍ତା ବୋଲି ତୁମ ଆବାହନ

କରିଲେ ଯେ ତିନି ଲୋକ,

ପ୍ରସନ୍ନ ହୋଇକି ଅବିଳମ୍ବେ ଦେବ

ନାଶୁଅଛ ତାଙ୍କ ଶୋକ ।।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।