ଦିନ ରାତି
ଦିନ ରାତି
ଦିନ ରାତି ଆଜି ଓଲଟା ହେଲାଣି
ବିପରୀତ ଏଠି ବେଳ
ରାତି ଲାଗେ ଏଠି ଦିନ ପରି
ସବୁଠି ଆଲୋକ ମାଳ l
ଦିନେ ଜେଜେମାଆ କହୁଥିଲେ ରାତି ଅଧ
ହୋଇଗଲେ ଅନ୍ଧାର ଚାରିଆଡେ
ଗ୍ରାମ ଦେବତୀ ଭ୍ରମଣ କରନ୍ତି ଦାଣ୍ଡେ
ଝୁଣା ବାସ୍ନାରେ ମହକି ପଡ଼େ l
ନିର୍ଜନତା ସଙ୍ଗେ କିଟିକିଟି ଅନ୍ଧାର
ଠାକୁରାଣୀ ଭ୍ରମଣ କାଳେ
କେହି ଅଜାଣତେ ସମ୍ମୁଖେ ପଡିଲେ ତାଙ୍କ
ପ୍ରମାଦ ପଡଇ ଭଲେ l
ଆଜି ନାହିଁ ଆଉ ସେ ନିର୍ଜନତା
ସବୁବେଳେ କୋଳାହଳ
ସଭିଙ୍କ ହାତରେ ଶୋଭେ ଦୂରଭାଷ ଯନ୍ତ୍ର
ପଡିଛି ସବୁଠି ଚହଳ l
କାନରେ ଇୟର୍ ଫୋନ୍ ଟିକୁ ଖଞ୍ଜି
ଗୀତେ କିଏ ମଗନ
କିଏ କରୁଅଛି କାମ କମ୍ପ୍ୟୁଟର ଦ୍ୱାରା
ଲାଗୁଛି ଯେପରି ଦିନ l
ରାତିରେ ଅନିଦ୍ରା ବିତେଇ ଦେଇଣ
ଦିନରେ ପଡେ ଘୁମେଇ
ପ୍ରାତଃସ୍ନାନ ସଂସ୍କାର ସବୁ ଦୂରେ
କେଡେ ବିପରୀତ ଇଏ l