ଦିବ୍ୟରଙ୍ଗ
ଦିବ୍ୟରଙ୍ଗ
ରଙ୍ଗରେ ରଙ୍ଗରେ ବରଷିଲା ସୁଧା
ହେଲା ଜଡସଡ ଦେହମନ
ରଗଡ଼ି ଘଷିଲେ ଦିଶେ ଜକ ଜକ
ଲାଜେଇ ବି ଯାଏ ଦରପଣ ।
ଛାଡ଼େ ନାହିଁ ନାଲି ପାଦର ଅଳତା
ନୂଆ ନୂଆ ପୁଟ ହୁଏ ଚଢ଼ା
ସିନ୍ଦୂର କୁଙ୍କୁମ ମେହେନ୍ଦୀ କଜ୍ଜଳ
ହାତ ଗୋଡେ କୁଟା ଛବି ଚିତା ।
କେଶ ପରିପାଟୀ ରୈ।ପ୍ୟ ତାରକସୀ
ସୁବର୍ଣ୍ଣ ଧାତବ ଅଳଙ୍କାର
ଚୂଡି ମଥାମଣି ଫୁଲ ଗଳାହାରେ
ମୋତି ମାଣିକ୍ୟ ସମ୍ଭାର ।
ରଙ୍ଗ ପ୍ରସ୍ତରରେ ଶୋଭିତ ମୁଦ୍ରିକା
ହୀରକ ଉଜ୍ଜ୍ୱଳ ଜ୍ୟୋତି
ରୁଣୁଝୁଣୁ ଶୁଭେ ପାଦର ପାଉଁଜି
ବାଜୁବନ୍ଧ ଆଉ ଅଣ୍ଟାପଟି ।
ବରଷଇ ରଙ୍ଗ ଜୀବନେ ସଞ୍ଚରେ
ଅମୃତ ସ୍ନେହ ସୋହାଗ
ବସନ ଭୂଷଣ ଗୃହ ସଜ୍ଜା ପାକେ
ଭରପୂର ରଙ୍ଗ ଅନୁରାଗ ।
ଝୋଟିରେ ଚିତାରେ କାଷ୍ଠ ପ୍ରସ୍ତରରେ
ରଙ୍ଗ ଚିତ୍ର ସୂକ୍ଷ୍ମ ଚାରୁକଳା
ଉତ୍କର୍ଷ କଳାରେ ଆଦର୍ଶ ଉତ୍କଳ
ନୃତ୍ୟ ଗୀତ ଛନ୍ଦ ସୁମଧୁରା ।
ନିତ୍ୟ ସୁରଭିତ ଜୀବନର ପୁଷ୍ପ
ଭାଷା ଓ ସଂସ୍କୃତି ସମୁଜ୍ଜ୍ୱଳା
ଅତୁଲ୍ୟା ଅନନ୍ୟା ଅପୂର୍ବା ଓଡ଼ିଶା
ଦିବ୍ୟରଙ୍ଗ ପୂର୍ଣ୍ଣ ଷୋଳକଳା।