ଦେଖିଛକି ପିଲେ ବାଇ ଚଢେଇ

ଦେଖିଛକି ପିଲେ ବାଇ ଚଢେଇ

କେତେ ପରିଶ୍ରମୀ ପକ୍ଷୀଟି ସେଇ,

ଦିନ ଦିନ ସଞ୍ଚି ନଡ଼ା ଓ କୁଟା

ଅତି ଯତନରେ ଘର ଗଢଇ ।

ଆମେମାନେ ସିନା କରୁ ଆଳସ୍ୟ

ଶୋଇ ପଡ଼ୁ ଦିନେ କରିବିଳାସ,

ରାତ୍ରୀ ପାହୁ ସେ ଯେ ଉଠିପଡଇ

ସଞ୍ଜ ହେଲେ ଯାଇ ମାରେ ନିଶ୍ୱାସ ।

ଦେଖି ନିରୋଳା ସେ ଗଢଇ ବସା

ଦୃଢମନବଳ ଉଚ୍ଚ ତା ଆଶା ,

କ୍ଷେତ ପାଖ ଅବା ପଡ଼ିଆ ଜାଗା

ନୁଆଣିଆ ଗଛ ତାର ଭରଷା I

ଯେତେ ଆସୁ ବାଆ ନାହିଁ ତା ଡର

ଭାରି ମଜଭୁତ୍‌ ତାହାରି ଘର ,

ନିଶ୍ଚିତରେ ରହେ ବରଷା ଦିନେ

ନେଇ ପିଲା ଛୁଆ ଛୋଟ ସଂସାର ।

ଟିକି ଚଢେଇ ସେ ଭାରି ସୁନ୍ଦର

ହଳଦୀ ମାଟିଆ ଦେହଟି ତାର ,

ସାହାସ ପଣରେ କେ ପାରେ ତାକୁ

ତା ପରିଶ୍ରମକୁ ଦେଖୁ ସଂସାର ।

ଆଉ ଦିଶୁନାହିଁ ବାଇଚଢେଇ

କାଳ ସଙ୍ଗେ ଗଲେ ସିଏ ଉଭେଇ,

ଜଳବାୟୁ ହେଲା ପରିବର୍ତ୍ତନ 

ଦିନୁ ଦିନ ଗଲେ ସେ ଲୋପ ପାଇ ।