ଆମରି ସଜ ଆସିଛି ରଜ

ଆସ ଅପାମାନେ ଆସ ଲୋ ମିତ

ଆସ ଲୋ ବଉଳ ଆସ ସଙ୍ଗାତ,

ହଳଦି ବାଟିବା ହୋଇବା ସଜ 

କାଲି ହେବ ପରା ପହିଲି ରଜ ।

ଚୁନ ଗୁଆ ପୁଣି ନାଲି ଖଇର

ମଧୁରୀ ଧନିଆଁ ପାନପତର,

ସଜାଡ଼ି ରଖିବା ପାନ ଡଲାରେ

ପାଟି ନାଲି ହେବ ପାନଖିଲରେ ।

ଚାଲଲୋ ଆଣିବା ବାସନା ତେଲ

ବେଣୀ ପାଇଁ ପୁଣି ମଲ୍ଲିର ଫୁଲ ,

ବାସ ଅତରକୁ ନାଲି ଅଳତା

ନାନା ରଙ୍ଗ ଚୁଡ଼ି ସଙ୍ଗେ ସାଇତା ।

ନୂଆ ପୋଷାକକୁ ନୂଆ ପାଉଞ୍ଜି

ରଖିବା ଆସଲୋ ଯତନେ ଖଞ୍ଜି,

କଜଳ ପାନିଆଁ ନାଲି ରିବନ

ଦେଖିକି ହେଲାଣି ମନ ଉଚ୍ଛନ ।

ଜେଜେ ମା ଲଗାଇ ଦେଲାଣି ଚୁଲି

ପିଠା ପୋଡିବାକୁ ଗଲାଣି ଚାଲି ,

ନରମ ନରମ ପିଠାକୁ ଖାଇ

ବୁଲିବାକୁ ଯିବା ଆମେରେ ସାଇ ।

ଡୋଳି ଡାକିଲାଣି ଗଛରେ ଝୁଲି

ଖେଳିବାକୁ ଯିବା ଆମେରେ ବୁଲି,

ବାଗୁଡି ସାଙ୍ଗକୁ ତାସ୍ ଖେଳ

ଜଣାପଡ଼େ ନାହିଁ ସରଇ ବେଳ ।