ଦେଖିବି ମୁଁ ପାଦପଦ୍ମ

ବରଷକେ ଥରେ  ଆସିଅଛି ଆଜି

    ଅଁଳା ନବମୀ ତିଥି

ମାତା ରାଧାରାଣୀ  ଓଡିଆଣୀ ବେଶେ

   ପୂଣ୍ୟ ଦରଶନ ବିଧି ।

ମାତା ପାଦପଦ୍ମେ  ଝୁଣ୍ଟିଆ ପାଉଞ୍ଜି

   ମୁଦ୍ରିକା ଅଳତା ନାଲି

ପିନ୍ଧି ପାଟ ଶାଢ଼ି  କାଣିକଚ୍ଛା ମାରି

   ପଣତ ପଡିବ ଝୁଲି ।

ଗଣ୍ଠି ପଡିଥିବ   କାନି ପଛପଟେ

   ଗୁଆ ଦୂବ ଓ ଅକ୍ଷତ

ପିନ୍ଧିଥିବେ ମାତା  ସୁବର୍ଣ୍ଣ କୀରିଟି

  ସେବତୀର ହାର ନୋଥ ।

 ଅଁଳା ତାବିଜ  ହରଡ଼ର ମାଳ

   ଭୂଷଣ କମରପଟି

ରଙ୍ଗ ଫୁଲମାଳ  ଅଁଳା କୋଳି ପତ୍ର

  ତୁଳସୀ ଚନ୍ଦନ ଲାଗି ।

ବଡି ପ୍ରତ୍ୟୁଷରୁ  ମଙ୍ଗଳ ଆଳତି

   ଅଁଳା ପୂଜା ଅର୍ଚ୍ଚନା

ଶଙ୍ଖା ଓ ସିନ୍ଦୂର  ହଳଦୀ ବସ୍ତ୍ରରେ

   ହୁଏ ଅର୍ଘ୍ୟ ବନ୍ଦାପନା ।

ଚାଲେ ସୂର୍ଯ୍ୟପୂଜା  ନଟବର ବେଶ

   ମରଦନ ଅବକାଶ

ସରିଲେ ବଲ୍ଲଭ   ସକାଳର ଧୂପ

  ମଦନମୋହନ ଭୋଗ ।

ସରପୁଳି ଲଡୁ  ଛତୁ ଲାଗେ ଭୋଗ

   ପରିପୂର୍ଣ୍ଣ ନୀତିକାନ୍ତି

ସାହାଣ ହୁଅଇ  ମନ୍ଦିରରେ ମେଲା

   ମାତା ଦର୍ଶନ ଦିଅନ୍ତି ।

ଯୋଗୀ ଋଷି ମୁନୀ  ଦେବଙ୍କୁ ଦୁର୍ଲଭ

   ଦର୍ଶନ ଶ୍ରୀରାଧା ପଦ

ମିଳେ ସଦଗତି   ମୁକତି ବିଭୂତି

  ସେ ପଦୁ ଝରେ ଅମୃତ ।

ଦେଖିବି ଆଜି ମୁଁ  ନୟନ ପୂରାଇ

   ଶ୍ରୀରାଧା ପଦ ପଙ୍କଜ

ଲଭି ପରମାର୍ଥ   ସୁତୀର୍ଥ ପ୍ରସାଦ

   ଜୀବନ ହେବ ସାର୍ଥକ ।

     ------