ଚିନ୍ତନ ଶକ୍ତି
ଚିନ୍ତନ ଶକ୍ତି
ବାଳୁତ ପିଲାର ସରଳ ମନଟି
ହୃଦୟ ତାହାର କୋମଳ ଥାଏ,
ଯାହା ସେ ଦେଖଇ ତାହାସେ କହଇ
ବୁଝେନା ସଂସାର ଛନ୍ଦକୁ ସିଏ l
ପରିପକ୍ୱ ଯେଣୁ ମନ ନୁହେଁ ତାର
ଭରସି ଯାଏ ସେ ସବୁ କଥାରେ,
ସହଜରେ ତାକୁ ଠକାଇ ଦିଅନ୍ତି
ଦୁଷ୍ଟ ଲୋକ ମାନେ ଏ ସମାଜରେ l
ବୟସ ବଢିଲେ ପରିପକ୍ୱ ହୁଏ
ବିଚାର ଚିନ୍ତନ ସବୁ ଦିଗରେ,
ବୁଦ୍ଧିକୁ ଖଟାଇ ବିଚାର କରନ୍ତି
କି ଭାବ ରହିଛି କେଉଁ ତତ୍ତ୍ୱରେ l
ପରିପକ୍ୱ ଯାର ଚିନ୍ତନ ରହିବ
ଗୁଣୀ ଜ୍ଞାନୀ ପରା ବୋଲାନ୍ତି ସିଏ,
ଭଲ ଭାବେ ବୁଝି କାର୍ଯ୍ୟ କୁ କରିଲେ
ସୁ ଫଳରପ୍ରାପ୍ତି ସହଜ ହୁଏ l
ପରିପକ୍ୱ ଫଳ ସ୍ୱାଦ ଲାଗିଥାଏ
କଞ୍ଚା ଫଳରେ କି ଥାଏ ସୁଆଦ,
ଯେତେ ଯତ୍ନ କରି ରଖନା ତାହାକୁ
ଜଣା ପଡ଼ିଯାଏ ତା ଭଲ ମନ୍ଦ l
ଶିକ୍ଷା ଦୀକ୍ଷା ଆଉକର୍ମ ଅନୁଭବ
ପରିପକ୍ୱ ଆଣେ ଜୀବନେ ଆମ,
ସେସବୁ ନଥିଲେ ସମାଜରେ କେବେ
ହୋଇପାରେ ନାହିଁ କାର ସୁନାମ l
ପରିପକ୍ୱ ଚିନ୍ତା ଗଠନ ମୂଳକ
ସମାଜକୁ ଦିଏ ଦିଗଦର୍ଶନ,
କାଳ କାଳଧରି ସ୍ମାରକୀ ସାଜଇ
ଗୀତା ରେ ଯେପରି କୃଷ୍ଣ ଅର୍ଜୁନ ।