ବୃକ୍ଷ ରୋପଣ

ସଂପ୍ରତି ବିଶ୍ୱର ପରିବେଶ ଆଉ

      ରହୁନାହିଁ ସନ୍ତୁଳିତ,

ବଢିଛି ଉତ୍ତାପ,ଋତୁଚକ୍ର ମଧ୍ୟ

      ଘୁରିବାରେ ଅସଂଯତ ।

ବର୍ଷା ହେଉନାହିଁ ଆବଶ୍ୟକ ବେଳେ

      କୃଷିକ୍ଷେତ୍ର ଶୁଖି ଯାଏ,

ଅଦିନିଆ ମେଘ ଆଣୁଛି ତୋଫାନ

      ସବୁ ନଷ୍ଟ କରିଦିଏ ।

ଅତୀତରେ ଯେତେ ସବୁଜ ଅରଣ୍ୟ

     ଥିଲା ଏଇ ପୃଥିବୀରେ,

ମଣିଷ ତାହାର ସ୍ୱାର୍ଥ ପାଇଁ ସବୁ

      କାଟିଚାଲେ ଆନନ୍ଦରେ ।

କଳ କାରଖାନା ବହୁଳ ଭାବରେ

      ଚାରିଆଡେ ମୁଣ୍ଡ ଟେକେ,

ବାୟୁ ମଣ୍ଡଳକୁ ଦୂଷିତ କରୁଛି

      ପ୍ରତିକୂଳ ଜୀବ ପକ୍ଷେ ।

ନୂତନ ଜଙ୍ଗଲ ସୃଷ୍ଟି ପାଇଁ ଏବେ

     ବିଶ୍ୱେ ସଚେତନା ଜାରି,

ନହେଲେ ସଂସାରେ ଜୀବନ ଅକାଳେ

     ନିଶ୍ଚୟ ଯିବ ଯେ ମରି ।

ପ୍ରତି ବିକଶିତ ରାଷ୍ଟ୍ରେ ଅର୍ଥ ବ୍ୟୟେ

      ହେଉଛି ଜଙ୍ଗଲ ସୃଷ୍ଟି,

ତଥାପି ମଣିଷ କାଟୁଚି ଜଙ୍ଗଲ

      ସ୍ୱାର୍ଥପାଇଁ ଲୁଚି ଲୁଚି ।

ପ୍ରତ୍ୟେକ ମଣିଷ ସଚେତନ ହେବା

      ଅଟେ ନିହାତି ଜରୁରୀ,

ବୃକ୍ଷ ରୋପଣ ଯେ କରିବା କର୍ତ୍ତବ୍ୟ

      ଜଙ୍ଗଲ ସୁରକ୍ଷା କରି ।