ମା

ମା ତୋ ପଣତ ଥିଲା ମୋ ଜଗତ

ନଥିଲା ଟିକେବି ମୋହ 

ପଣତ ଛାଡ଼ିଲି ମୋହେ ବୁଡ଼ିଗଲି

ଛାତିରେ ଭରିଲା କୋହ ll

ସୁଖର ସାଥୀ ମୋ ଦେଖାଇଲେ ପ୍ରୀତି

ଛାଡ଼ିପାରିଲିନି ମୋହ 

କ୍ଷଣ ଆଲିଙ୍ଗନ ମିଥ୍ୟାର ଦହନ

ଦୁଃଖ ଦିଏ ଅହରହ ll

ତୁହି ଯେବେ ଥିଲୁ ମାଆ ମୋହରି ଦୁନିଆ

ଭୁଲିଥିଲି ସବୁ ଦିଅଁ 

ବାହାର ଦୁନିଆ କରିଲା କିମିଆଁ

ଦୁଃଖ ପକାଇଲା ନିଅଁ ll

ମୋ ଦୁଃଖ ସବୁକୁ ସାଉଁଟି ନେଇ ତୁ

ଦେଲୁ ମୋତେ ପରିଚୟ 

ସୁଖର ପସରା ଯାହାକୁ ଭାବିଲି

ସିଏ ହେଲା ନିରିଦୟ ll

କେଉଁ ଜନମର ପାପ ପାଇଁ ଆଜି

ତୋଠୁ ଦୂରେଇ ରହିଛି କହ 

ସେନେହ ତୋର ପଡ଼ିଗଲେ ମନେ

ଆଖିରୁ ଝରଇ ଲୁହ ll