ତୁମେ ଅଛ ପ୍ରଭୁ
ତୁମେ ଅଛ ପ୍ରଭୁ
ତୁମେ ଅଛ ପ୍ରଭୁ ମୋ ମନ ମନ୍ଦିରେ,
ତୁମ ଛବି ନାଚେ ପ୍ରତି ପଲକରେ l
ସର୍ବ ଶକ୍ତିମାନ
ତୁମେ ନାରାୟଣ
ବାସ ପରା ତୁମ ସବୁରି ଅନ୍ତରେ,
ତୁମେ ଅଛ ପ୍ରଭୁ ମୋ ମନ ମନ୍ଦିରେ ll
ତୁମେ ମୋ ସାହାରା ତୁମେ ମୋ ଜୀବନ,
ମିଛ ଛଳନାର ନୁହେଁ ଏ ବନ୍ଧନ l
ହେ ଚକାନୟନ
ମୋ ଜୀବ ଜୀବନ
ତୁମେ ତାରା ମୋ ଶୂନ୍ୟ ଆକାଶରେ,
ତୁମେ ଅଛ ପ୍ରଭୁ ମୋ ମନ ମନ୍ଦିରେ ll
ସର୍ବସ୍ବ ସମର୍ପି ଚରଣେ ତୁମରି,
ଜୀବନ ଦେଇଛି ତୁମ ନାମେ କରି l
ନୀଳାଦ୍ରିବିହାରୀ
ହେ ଭବନାଉରୀ
ତୁମେ ନାଉରିଆ ଜୀବନ ନାଆରେ,
ତୁମେ ଅଛ ପ୍ରଭୁ ମୋ ମନ ମନ୍ଦିରେ ll
ଅଶାନ୍ତ ଅକୁହା ଅନ୍ତର ଦହନ,
ଶାନ୍ତ କରି ତୁମେ ତୃପ୍ତ କର ପ୍ରାଣ l
ହେ ଦୁଃଖନାଶନ
ପତିତପାବନ
ଆସ ତନ୍ଦ୍ରାଚ୍ଛନ୍ନ ସପନ ଦୋଳାରେ
ତୁମେ ଅଛ ପ୍ରଭୁ ମୋ ମନ ମନ୍ଦିରେ ll
କମଳା ବଲ୍ଲଭ କରୁଣା ସାଗର,
ମୋ ମନ ହୃଦୟ ସବୁତ ତୁମର l
ଦୟାର ସାଗର
ହେ ବଡ଼ ଠାକୁର
ମନ ମୋର ରହୁ ସଦା ତୁମଠାରେ,
ତୁମେ ଅଛ ପ୍ରଭୁ ମୋ ମନ ମନ୍ଦିରେ ll