ଚଢେଇ

ଶିକାରୀ ଭାଇରେ ଶିକାରୀ ଭାଇ 

କୁଆଡେ ଯାଉଛୁ ମତେ ତୁ ନେଇ । 

ବସାରେ ଅଛନ୍ତି ମୋ ଶିଶୁ ଦୁଇ 

ବନ୍ଧନୁ ମତେ ତୁ ଦେ ଫିଟାଇ । 

ଉଡି ଶିଖି ନାହିଁ ଉଠିନି ପକ୍ଷ 

କେ ବୁଝିବ ତାଙ୍କ ପେଟର ଭୋକ । 

ପିଲା ମୁଖେ ଦବା ପାଇଁ ଆଧାର 

ଉଡି ଯାଇଥିଲି ମୁଁ ବହୁଦୂର । 

ଖାଦ୍ଯର ଆଶାରେ ଥିଲି ଓହ୍ଲାଇ 

ଅଠାକାଠି ଜାଲେ ପଡିଲି ଜାଇ । 

ପଞୁରିର ସୁଖ ମୋ ଲୋଡା ନାହିଁ 

ବଣ ପାହାଡକୁ ମନ ଝୁରଇ । 

ଉଡୁଥାଏ ମୁହିଁ ଆକାଶ ବକ୍ଷେ 

ଖାଉଥାଏ ଫଳ ମୋ ମନ ସୁଖେ । 

ଗଛ ଡାଳେ ବସି ଗାଏ ମୁଁ ଗୀତ 

ଏ ବଣ ଝରଣା ସବୁ ମୋ ମିତ । 

କାଠି କୁଟା ନେଇ ତୋଳେ ମୁଁ ଘର 

ଝଡ ବତାସ କୁ ନଥାଏ ଡର । 

ଦୟା କରି ମତେ ଦେ ତୁ ଛାଡି

ବଣ ପାହାଡକୁ ଯିବି ମୁଁ ଉଡି ।