ବୁଲା ଷଣ୍ଢ

ଗାଁ ଗଣ୍ଡା ଗଳିକନ୍ଦି ସବୁଠି

ମାତବର ଏବେ ବୁଲା ଷଣ୍ଢ ।

ବେଫିକର ଏହି ପ୍ରାଣୀ

ନାନାବିଧ ରଙ୍ଗ,

ମାନନ୍ତିନି କିଛି ବାଡ଼ ବତା

ନାଁ ଥାଏ କାହାରିକୁ ଭୟ ।

ଦିନକୁଦିନ ବୁଲା ଷଣ୍ଢ ସଂଖ୍ୟା

ବି ପ୍ରବଳ, ବେଳକାଳେ

ରାସ୍ତାଘାଟ ଥରହର ,ଧୂଳିଉଡେ

ଲଢାଲଢି ଚାଲେ ଘନଘୋର,

ଅକାରଣେ ଭାଙ୍ଗି ଯାଏ ଗାଡ଼ି ଘୋଡା

ବିଚରା ଗରିବଙ୍କ ଝାଟିମାଟି

ଚାଳ ଘରଦ୍ୱାର ।

ମେଲାଖାଉ ବୁଲା ଷଣ୍ଢ

ନଷ୍ଟ କରେ ଗଛବୃକ୍ଷ 

କ୍ଷେତରେ ଫସଲ,

ଶିବଶମ୍ଭୋ ବାହନ ପ୍ରକଟେ

ଚାଷୀ ମୁଣ୍ଡେ ହାତ ଦିଏ

କ୍ଷତି ସହେ, ରାତି ରାତି

ରହେ ଉଜାଗର ।

ଷଣ୍ଢମାର୍କା ଟୋକା ଯେତେ

କାଶିଆ କପିଳା,

ଧରିବାକୁ ବାନ୍ଧିବାକୁ ବୁଲା ଷଣ୍ଢ 

ଭାରି ସିଦ୍ଧହସ୍ତ,

ଓଗାଳନ୍ତି କାଳିଦାସ ଚଉପଦୀ ଛାନ୍ଦ

ପ୍ରଦର୍ଶନ୍ତି କଳା ଓ କୈ।ଶଳ ।

ଗାଁ ଲୋକେ ମେଳି ବାନ୍ଧି

ନିଜ ଗାଁ ଷଣ୍ଢ ସବୁ ରାତାରାତି

କିଛିଦୂର ଅନ୍ୟ ଗ୍ରାମ ସରହଦେ

ଛାଡ଼ିବାରେ ବ୍ୟସ୍ତ,

ପରିଣାମ ଶୂନ୍ୟ, ବରଂ ଉତ୍ତେଜନା ବୃଦ୍ଧି

ଗ୍ରାମେ ଗ୍ରାମେ

ଶାନ୍ତି ବିପର୍ଯ୍ୟସ୍ତ ।

କୃଷି ପାଇଁ ଗୋପାଳନ ଉପଯୋଗୀ

ଷଣ୍ଢ ବଂଶ ଅବଶ୍ୟ ସମ୍ବଳ,

କିନ୍ତୁ ବୁଲା ଷଣ୍ଢ ବହୁଳତା

ବଢ଼ାଉଛି ଚିନ୍ତା ଜ୍ୱର

ପାଲଟୁଛି ଅହିତ କାରଣ ।

ନରାଧମ ପରଜୀବୀ ଉତ୍ପାଦନ,

ବୁଲା ଷଣ୍ଢ ଉତ୍ସର୍ଗ ସହଜ,

ଅତି ଭକ୍ତି ଚୋରର ଲକ୍ଷଣ;

ରୋକାଯାଉ ବେଳ ଥାଉଁ

ଅପାରଗ ଅନ୍ଧଭକ୍ତି ଅହିତକରଣ,

ଷଣ୍ଢପାପା ଦୟା କରି

ଷଣ୍ଢକୁ ପାଳନ୍ତୁ,

ଏଣେତେଣେ ବୁଲା ନ ଛାଡ଼ନ୍ତୁ,

ମେଲାଖାଉ ବୁଲା ଷଣ୍ଢ

ରହନ୍ତୁ ଖୁଆଡେ,

ଅମାନିଆ ପାଶବ ପ୍ରବୃତ୍ତି ହେଉ

ସନ୍ତୂଳିତ, ପ୍ରଶମିତ

ସାଧାରଣ ମଣୁ ସୁରକ୍ଷିତ ।