ବର୍ଷା ଝରେ
ବର୍ଷା ଝରେ
ଆଷାଢ଼ ବାଢ଼ିଛି ଭବ୍ୟ ସମ୍ବର୍ଦ୍ଧନା ଉତ୍ସବ ମୁଖର ମହୀ
ଅସୀମ ଆନନ୍ଦେ ଆକାଶ ବୁକୁରୁ ବର୍ଷା ଝରେ ଗୀତ ଗାଇ ।
ଡମ୍ବରୁ ନାଦରେ ବିଜୁଳି ରୋଷଣୀ ମହ୍ଲାର ରାଗିଣୀ ସୁରେ
ପବନେ ପବନେ ନିନାଦିତ ପ୍ରେମ ଶାଶ୍ୱତ ସେ ମୂର୍ଚ୍ଛନାରେ ।।
ମାଟି ଅଗଣାରେ ପ୍ରୀତିର କୈବଲ୍ୟ ପବିତ୍ର ପୀୟୂଷ ଧାରା
ଶ୍ୟାମଳିମା ବଧୂ ସାଜିଛି ପ୍ରକୃତି ତନୁ ସିକ୍ତ ଚିତ୍ର ତୋରା ।
ଅଭିସାର ପ୍ରାଣ ଭାବମଗ୍ନ ସତେ ପ୍ରୀତିପୂର୍ଣ୍ଣ ଆଶ୍ଳେଷରେ
ଋତୁମତୀ ଶୋଭା ସୁରମ୍ୟ ମଞ୍ଜୁଳ ମିଳନର ପାର୍ବଣରେ ।।
କୁସୁମ ମଞ୍ଜରୀ ବର୍ଣ୍ଣାଢ୍ୟ ଆସର ଆକର୍ଷଣେ ମୁଗ୍ଧ ମନ
ଅପୂର୍ବ ମହକ ଚୌଦିଗେ ପ୍ଳାବିତ ହୃଦୟେ ବିଭୋର ପଣ ।
ଭୂମିଠାରୁ ଭୂମା ସପ୍ତରଙ୍ଗ ଆଭା ଇନ୍ଦ୍ରଧନୁ ପରଶରେ
ମଧୁର ତୃପ୍ତିର ଝଙ୍କାର ତୋଳୁଛି ପ୍ରତୀକ୍ଷିତ ସ୍ପନ୍ଦନରେ ।।
ଆବେଗ ଉଚ୍ଛ୍ୱାସ ଜଡିତ ଜୀବନେ ନିରାଶ ବିହୀନ ହର୍ଷ
ଝୁମିଯାଏ ମନ ନୃତ୍ୟରତା ପ୍ରାଣ ଭୁଲି ଅତୀତର କ୍ଳେଶ ।