Library
Profile
ମଙ୍ଗଳମୟ ସାଜ ନବବର୍ଷ
ମଙ୍ଗଳମୟ ସାଜ ନବବର୍ଷ
ନୂତନ ହୋଇଛି ପୁରାତନ ଆଜି
ଅତୀତେ ହୋଇଛି ଲୀନ
ସମୟ ର ଚକ୍ର ଘୁରେ ଅହ ରହ
ହୋଇନାହିଁ କେବେ କ୍ଷୁର୍ଣ୍ଣ ।
ମଙ୍ଗଳମୟ ସାଜ ନବବର୍ଷ
ନବ ଉନ୍ମାଦନା ଭର
ସ୍ନେହ, ଶ୍ରଦ୍ଧା, ପ୍ରେମ, ପ୍ରୀତିର ପରଶେ
ଧରାକୁ ସୁନ୍ଦର କର ।
ସର୍ବ ମଙ୍ଗଳକୁ ସଙ୍ଗେ ନେଇ ଆସ
ବୁହାଅ ପବିତ୍ର ଧାରା
ଧୋଇଯାଉ ଯେତେ ଦୁଃଖର କାଳିମା
ଛୁଟୁ ଆନନ୍ଦ ଜୁଆରା ।
ମଙ୍ଗଳ ଶଙ୍ଖର ଧ୍ଵନୀ ଶୁଣାଅ ହେ ଓଁ କାର ର ଧ୍ଵନୀ ଶୁଭୁ
ମନରେ ପବିତ୍ର କମ୍ପନ ଭରୁ
ମନ ପରିମଳ ହେଉ ।
ହେ ନବ ବରଷ ପ୍ରତି ପରିବାରେ
ହସର ଜୁଆର ଖେଳୁ
ଗାଁ ରୁ ସହର ପରିମଳ ହେଉ
ମନରେ ଶାନ୍ତି ବିରାଜୁ ।
ହେ ନବ ବରଷ ସଙ୍ଗେ ନେଇ ଆସ
ଶାନ୍ତି, ମୈତ୍ରୀର ପିୟୂଷ
ପ୍ରୀତିର ମହକ ଖେଳାଇ ଦିଅ ହେ
ମନରେ ଖେଳୁ ସନ୍ତୋଷ ।
ହେ ନବ ବରଷ ଏ ସମାଜେ ଭର
ସମତାର ଗୁରୁ ମନ୍ତ୍ର
ହୃଦୟ ନିର୍ମଳ କରିଦିଅ ଆହେ
ଜୀବନ ହେଉ ସ୍ଵତନ୍ତ୍ର ।
ମଙ୍ଗଳ କଳସ ଥାପି ଦିଅ ତୁମେ
ପ୍ରତି ଦୁଆର ସମୀପେ
ଶୁଭ ମୟ ହେଉ ସମାଜର ଧାରା
ରୋଗ କ୍ଲେଶ ଯାଉ ଦୂରେ ।
ମଙ୍ଗଳମୟ ସାଜ ନବ ବର୍ଷ
ଘରୁ ଅନ୍ତରୀକ୍ଷ ଯାଏ
ସବୁଜ କ୍ଷେତରେ ସୁନାର ଲହରୀ
ଦୁନିଆ ଭରୁ ବିତ୍ତରେ ।
ମଙ୍ଗଳ ଉଷାର ନବଦିଗନ୍ତରେ
ମଙ୍ଗଳ ସୁରୂଜ ଉଠୁ
ନବ ଉନ୍ମାଦନା ଭ୍ରାତୃତ୍ଵ ପ୍ରେମରେ
ମଙ୍ଗଳ ଆଳତୀ ଶୁଭୁ ।
ଜ୍ଞାନର ଆଲୋକ ଝରାଇ ଦିଅ ହେ
ମଙ୍ଗଳ ବାଜଣା ବାଜୁ
ମାନବିକତାର ସାହାନାଇ ବାଜୁ
ଅଶାନ୍ତି ହଜୁ ସମାଜୁ ।
ମଙ୍ଗଳମୟ ସାଜ ନବବର୍ଷ
ମଙ୍ଗଳ ଭାବନା ଭର
ତୁମରି ପରଶେ ମଣିଷ ମନରୁ
ହିଂସା ଦ୍ଵେଷ ତୁମେ ହର ।
ମଙ୍ଗଳମୟ ସାଜ ନବ ବର୍ଷ
ବିଶ୍ଵର ମଙ୍ଗଳ କର
ଲିଭି ଯାଉ ସବୁ ଯୁଦ୍ଧ ବିଭୀଷିକା
ଉଚ୍ଚାର ଶାନ୍ତି ମନ୍ତର ।
ମଙ୍ଗଳେ ମଙ୍ଗଳ ସୁମଙ୍ଗଳ ହେଉ
ପ୍ରାନ୍ତରୁ ଆକାଶ ଯାଏ
ପ୍ରଭୁ ଚେତନା ରେ ମନ ଯେ ମହକୁ
ତୁମରି ଆଗମନରେ ।
