ବରଷା ଆସିଲେ

ବରଷା ଆସିଲେ ମାଟି ଭିଜିଗଲେ

ଖେଳିଯାଏ ତା'ର ପ୍ରୀତି ସୁବାସ

ଝରକା ଏପାଖେ ମୋ ମନ ବିଭୋର

ଭରିଯାଏ ଓଠେ ମଧୁ ହରଷ ।

ରିମିଝିମି ବର୍ଷା ମାଟିକୁ ଚୁମଇ

ଆନମନା କରେ ମୋତେ ତା ସ୍ପର୍ଶ

ଦୁଇ ବାହୁ ଖୋଲି ନୀଳାକାଶ ତଳେ

ନାଚିଉଠେ ପାଦ ଭୁଲି ବିରସ ।

ବରଷାର ଧାର ଝରି ଆନନ୍ଦରେ

ଶ୍ୟାମିଳିମା କରେ ମାଟି ତନୁକୁ

ଶିହରିତ ହୁଏ ମୋ ସାରା ଶରୀର

ବୋଳିଦିଏ ସତେ ପ୍ରୀତି ରଙ୍ଗକୁ ।

ବରଷା ଆସିଲେ ବିଜୁଳି ଚମକ

କ୍ଷଣେ ବୃଦ୍ଧିକରେ ମାଟି ଶୋଭାକୁ

କାନେ କହିଯାଏ ସ୍ନିଗ୍ଧ ସମୀରଣ

ଏକା କାହିଁ ଭିଜୁ ଭୁଲି ସାଥିକୁ ।

ଓଦା ମାଟି ଭିଜେ ବରଷା ଟୋପାରେ

ଅପୂର୍ବ ମିଳନ ରଚେ ଧରାରେ

କୁଆଁରୀ ମନ ମୋ ଦଗ୍ଧ ହୋଇଯାଏ

ହୃଦୟ ସାଉଁଟି ସାଥି ସ୍ମୃତିରେ।