ବନ୍ଧନ
ବନ୍ଧନ
ତୁମ ହସ, ହସ ନୁହେଁ ଆଖିତଳ ଅଲେଖା ଅକ୍ଷର
ତୁମ କାନ୍ଦ, କାନ୍ଦ ନୁହେଁ କଦମ୍ବର କଅଁଳ ପତର ।
ତୁମ ଲାଜ, ଲାଜ ନୁହେଁ ଯେଉଁଦିନ ପାରିଲି ମୁଁ ଜାଣି
ସେହିଦିନ ତୁମଠାରୁ,ତୁମକୁ ମୁଁ ନେଲି ଦୂରେ ଟାଣି ।
ମାଟିଠୁ ଆକାଶ ଯାଏ ଭିଜେଇଲି ପ୍ରେମର ବର୍ଷାରେ
ହଜିଗଲା ତନୁମନ ଆବେଗର ଅଜଣା ସୁଅରେ ।
ସେ ସୁଅର ଧାରେ ଧାରେ ହସୁଥିଲା ନଈ,ନାଳ,ବନ
ବୟସର ବାଲିଘରେ ବାସୁଥିଲା ଚନ୍ଦନ ଚନ୍ଦନ ।
ଏ ସାରା ଜନମ ମୋତେ ଯିଏ ଆଜି କରିଦେଲା ଋଣୀ
ତା'ଆଖିର ଆଖି ହୋଇ ପାରିହେବି ଆଶା ବୈତରଣୀ ।
ପବନର ପାଲିଙ୍କିରେ ଗଢ଼ିଦେବି ସ୍ମୃତିର କଣ୍ଢେଇ
ହଜି ଯାଉଥିବ ଯେତେ ନିରାଶାର ଛଳ ଛଳ ନଈ ।
ସେ ନଈର କୂଳେ ବସି ଆଙ୍କୁଥିବି ଅସୁମାରୀ ଆଶା
ମୋ ହାତରେ ହାତଦେଇ ଓଠେ ଦେବ କେତେ ନୂଆ ଭାଷା ।
ସପନର ଶେଯ ପାରି ବିଶ୍ୱାସର ବଗିଚା ଭିତରେ
ଭିଜୁଛି ମୁଁ ଭିଜୁଥିବି ତୁମର ସେ ମିଠା ଦରଜରେ ।
କଥାଦେଲି ଆଜିର ଏ ଆନମନା ମଧୁର ଲଗନେ
ହସି ହସେଇବି ସାଥି ଜୀବନର ପ୍ରତିଟି ସୋପାନେ ।