ଜନ୍ମଦିନ

ସରି ସରି ଯାଏ ଦିନ ହେ ଠାକୁର

              ଲିଭି ଲିଭି ଯାଏ ଆୟୁ

ଆଜି ଖୁସି ଆଉ କାଲିକୁ ନଥିବ

              ସାହା ଏକା ମହାବାହୁ ।

ଶହେ ସରଗର ସୁଖ ଭରିଦିଅ

               ଶାନ୍ତିର ପୀୟୂଷ ଢ଼ାଳି

ହସି ହସେଇବି ସାରା ଦୁନିଆକୁ

              ସାଜି ତୁମ ପଦ ଧୂଳି ।

ସାରୁ ପତରର ପାଣି ଟୋପା ପରି

               ଏ ଜୀବନ ଜଳଛବି

କେବେ ଭାସିଯିବ ନଈର ସୁଅରେ

              କେବେ ଅବା ଯିବ ଡୁବି ।

ଜନମ ମରଣ ଅଢ଼େଇ ଦିନିଆ

              ସୁଖ ଦୁଃଖ ଦୁଇ ଭାଇ

ହସ କାନ୍ଦ ପରା ଦାଣ୍ଡ ଦୁଆରର

             ଲେଉଟାଣୀ ଖରା ଛାଇ ।

ବୟସ ବଢିଲେ ଆୟୂଷ ଖସଇ

              ପବନକୁ ଲାଗେ ଡର

ପ୍ରତିଟି ଜନମ ଦିନ ଆଣିଦିଏ

              ଫେଡାଣର ଅବସର ।

ତଥାପି ତୁମରି ଚରଣେ ଶରଣ

              ଦିଅ ହେ କଳା ନାଉରୀ

ପ୍ରେମର ପ୍ରଦୀପ ଜାଳୁଥିବି ନିତି

              ହେବାପାଇଁ ଭବୁ ପାରି ।