ତୃଷ୍ଣା ତୀର୍ଥ

ରାଶି ରାଶି ବାଲିର ଶେଯରେ

ସମୁଦ୍ରର ଶୂନ୍ୟତାକୁ

ପହଁରି ପହଁରି,

ନିରୁଦ୍ଦିଷ୍ଟ ସମୟର ବୋଝ ବୋହି

କୁହୁଳେ ସେ -

ଶବ୍ଦହୀନ ତୃଷ୍ଣାର ତୀର୍ଥରେ,

ଆଲୋକିତ ଅନ୍ଧାରରେ ଗଢିବାକୁ

ନକ୍ଷତ୍ରର ନୀଳ ଉପତ୍ୟକା ।

ଆପେକ୍ଷିକ ଆବେଗର

ନିଃସର୍ତ୍ତ ସ୍ତୋତ୍ରକୁ

ସମୟର ପାପୁଲିରେ ବଳି ଦେଇ

ଗଢ଼ିଛି ସେ -

ମୋହଗ୍ରସ୍ତ ଅଭେଦ୍ୟ ପ୍ରାଚୀର,

ଆକାଶର ଅଗଣିତ ତାରାଙ୍କ ମେଳରେ

ଫିଟେଇଛି ଆଭାର ମଞ୍ଜୁଳ,

ସତେଅବା

ମାୟାବିନୀ ରାତିର ପରଶେ

କାଉଁରୀ କାମାକ୍ଷା ଦ୍ବୀପେ ପରଖୁଛି

ବିଶ୍ୱାସର ବତୀଘର ସାଜି ।