ବିଶ୍ବରେ ବିଖ୍ୟାତ

ମୋ ଦେଶ ଭାରତ ସବୁଠାରୁ ଶ୍ରେଷ୍ଠ

    ବିଶ୍ବରେ ବିଖ୍ୟାତ ପରା

ତା ଗୁଣ ଗାଇବା ସାମର୍ଥ୍ୟ କାହାର

    ଯାହାକୁ ବହିଛି ଧରା।

କାଶ୍ମୀରରୁ କନ୍ୟା କୁମାରୀ ଲମ୍ବିଛି

     କଳେବର ସୁସୁନ୍ଦର

ଜନମ ଦେଇଛି କେତେ ଯେ ଲେଖକ

    ଲେଖିକାଙ୍କୁ ଗର୍ଭେ ତାର।

ଗଳ୍ପ କବିତାରେ ଯେତେ ରଚିଗଲେ

     କୀର୍ତ୍ତିରାଜି ଅସୁମାରୀ

ସମୁଦ୍ରକୁ ଶଙ୍ଖେ   ପରି ମନେହୁଏ

     ଗୁଣ ଗାନ ଯେ ତାହାରି।

ସେହି ମାଆ କୋଳେ ଜନମିଛେ ଆମେ

     ରଖିବା ତାହାର ଟେକ

ମହାନତା ଗୁଣେ  ମହିମା ରଚିବା 

   ମାଗିବାନି କେବେ ଭିକ।

ଦାରିଦ୍ର୍ୟତା ଠାରୁ ଦୂରେ ରହିବାକୁ

     କରୁଥିବା ପରିଶ୍ରମ

ସଭିଏଁ ସଭିଙ୍କୁ ସାହାଯ୍ୟ କରିବା

     ଭୁଲିଯିବା ପଥଶ୍ରମ।

ଅତି ଆପଣାର ଭାବିବା ଅନ୍ୟକୁ

    ଭାରତୀୟ ମନେ କରି

ଭାରତ ମାତାର ସନ୍ତାନ ଆମରେ

    ନାଚିବା ତ୍ରିରଙ୍ଗା ଧରି।