ବିନା କାଗଜରେ ଲେଖୁ ଅଛି ଚିଠି
ବିନା କାଗଜରେ ଲେଖୁ ଅଛି ଚିଠି
ବିନା କାଗଜ ରେ
ଲେଖୁଅଛି ଚିଠି,
ଆହେ ଜଗନ୍ନାଥ ସାଇଁ
ଝର କଲମ ମୋ
ଭ୍ରମର ବାପୁଡ଼ା,
ଫୁଲ ରେଣୁ ମୋର ସ୍ୟାହି ।
କେତେ ଅଳି ଅଛି
ଅଳପ ଲେଖୁଛି,
ପକେଇବ ଆଖି ଥରେ
ଯାଇ ମୁଁ ପାରୁନି
ଦେଖି ମୁଁ ପାରୁନି,
ପଡି ବିଷୟ ଜଞ୍ଜାଳେ।
ଭଙ୍ଗା କୁଡ଼ିଆରେ
ରୋଗ ବେମାର ରେ,
କଟେ ଦିନ ରାତି ମୋର
କଲା କରମ ର
ଫଳ ଏହା ମୋର,
ମୁହିଁ ଯେ ଦୋଷି ପାମର ।
ଭୁଲ୍ ଯେ ମୋହର
ଅଟଇ ଅପାର,
ଲୁଚେଇଲେ କି ଲୁଚୁଛି
ମିଛ ସତ କଲି
ଧନ ଅରଜିଲି,
ସାକ୍ଷୀ ତୁମ ଚକା ଆଖି ।
ଟାକି ବସି ଅଛି
ହୋଇବି ମୁଁ ସୁଖୀ,
ବାରତା ଦେବ ସତ୍ତ୍ୱର
ପ୍ରାଣ ପକ୍ଷୀ ମୋର
ଉଡି ଯିବ ଖର,
ମିଶିବ ପଦ୍ମ ପୟର ।