ଭ୍ରମେ ଭ୍ରମନ୍ତି ଭ୍ରମରେ

ଭ୍ରମୁଥିଲ ଯେବେ ଉଦ୍ୟାନ ସମୀପେ

ଆନମନା ତୁମେ ମାନମୟୀ

ଭ୍ରମରେ ଭ୍ରମନ୍ତି ଭ୍ରମର ସକଳେ

ସୁବାସ ରସ ଲାଳସା ନେଇ

ଗୋଲାପି ଅଧର ରଙ୍ଗ ରସ ମଖା

ମୃଦୁ ହାସେ କମ୍ପେ ରହି ରହି

ମନ୍ଦ ମରୁତର କୋମଳ ପରଶେ

କୋମଳ କଳିକା ଯାଏ ନଇଁ

ଭ୍ରମରେ ଭ୍ରମନ୍ତି ଲୋଲୁପ ମଧୂପ

ରସ ଆସ୍ଵାଦନ ତୃଷା ପିଇ।।

ତୁମ ରୂପ ରଙ୍ଗ ଆବେଗ ସୁଆଙ୍ଗ

ଭରମେଇ ଦିଏ ଯତି ମତି

ଶରମେଇ ଯେବେ ଚାହଁ ଫେରି ଫେରି

ହୃଦେ ଲେଖି ଯାଅ ପ୍ରୀତି ଅନୁଭୂତି

ସ୍ପନ୍ଦନ ବିସ୍ମୃତ ବିମୁଗ୍ଧ ହୃଦକୁ

ବାର ବାର ଦେଖେ ଛୁଇଁ ଛୁଇଁ।।

ତୁମେ ଭ୍ରମଣରେ ଭ୍ରମରେ ଭ୍ରମରେ

ଭ୍ରମନ୍ତି ମୁଖ କମଳ ପାଶେ 

ଅଞ୍ଚଳ ସଞ୍ଚାଳି ଅବା ହସ୍ତ ଚାଳି

ଆଡ଼ କର ଏଡ଼ିବା ପ୍ରୟାସେ

ବାରଣ ମାନେନା ଅବୁଝା ବାସନା

ଆଶେ ପାଶେ କଲେ ନାହିଁ ନାହିଁ।।