ଭକ୍ତର କାଳିଆ

ଭକ୍ତ ବିକଳିଆ ଭକ୍ତର କାଳିଆ

   ଭକତ ବାନ୍ଧବ ହରି

 ଭକ୍ତ ପ୍ରାଣ ଧନ ଭକତ ଜୀବନ

  ଭକ୍ତ ପାଇଁ ଅବତରୀ

ଭକତର ତୁହି  ଭକତ ଗୋସାଇଁ

   ଭକତ ସୁନ୍ଦର ବର

ଭକ୍ତିକୁ ନିକଟ ଭକ୍ତିରେ ଆକଟ

  ଭକତ ପ୍ରିୟ ଠାକୁର

ଭକ୍ତ ତୁମ ପିତା ଭକ୍ତ ତୁମ ମାତା

  ଭକ୍ତ ସଖା ସହୋଦର

ଭକ୍ତ ସଙ୍ଗେ ଭାବ ଭକ୍ତର ବିଭବ

  ଭକ୍ତ ପ୍ରାଣର ଠାକୁର

ଭକତ ବିଦୁର ଭାବରେ ଆତୁର

   ଭଜା ଶାଗ ମଜା ନେଲ

ଭକତ ସୁଦାମା ଭଜା ଖୁଦ ଖାଇ

   ଭାବେ ଗଦ ଗଦ ହେଲ

ଭକତ ଶବରି ଭକତି ରେ ପଡି

  ଭୁଞ୍ଜିଲ ଅଇଁଠା କୋଳି

ଭକତ ଶ୍ରୀବତ୍ସ ଭର୍ତ୍ସନା ଗୋଇଠା

  ଭାବେ ଧରିଲ ସମ୍ଭାଳି

ଭକତର ତୁମେ ଭକତ ତୁମର

   ଭକତ ପରାଣ ବନ୍ଧୁ

ଭକ୍ତସଙ୍ଗେ ଲୀଳା ଭକ୍ତସଙ୍ଗେ ଖେଳା

    ଭକ୍ତଭାବେ କୃପାସିନ୍ଧୁ