ଭିଜା ଭିଜା ସ୍ମୃତି

ଭିଜା ଭିଜା ସାରା ଦିନ

ଭିଜା ଭିଜା ପୁଣି ଜାମିନୀ

ଭିଜି ଭିଜି ଝୁରେ ଏ ମନ

ପ୍ରେମେ ପ୍ରିୟା କାହିଁ ଭିଜେନି ।

ଜଳଦ କି ଢାଳୁଅଛି ଲୁହ

ମୋ ଅନ୍ତର ବେଦନା ବୁଝି

ଅବିଶ୍ରାନ୍ତେ ବାରି ଧାରା ତାର

ଦିବା ନିଶି ଯାଏ ବରଷି l

ଚୋରା ଚାହାଣୀରେ ବୁଲି ଚାହିଁଥିଲ

ଏମିତି ଝିପଝିପ ବରଷା ରେ

ଯୌବନ ଉପଵନେ ପାଦ ଥାପୁଥାପୁ

ମନହାରିଥିଲି ପ୍ରିୟେ ତୁମ ଠାରେ l

ସାଧବବୋହୂ ପରି ତୁମରତ ଚାଲି

ବର୍ଷାର ରୁଣୁଝୁଣୁ ସ୍ୱରେ ହୃଦୟରାଣୀ

ଗାଉଥିଲ ଗୀତ ମଧୁର ରାଗରେ

ଯେପରି ସେ ପ୍ରଣୟ ରାଗିଣୀ l

ଭିଜେଇ ଦେଇଗଲ ପ୍ରେମ ବର୍ଷାରେ

ହୃଦୟ କାନ୍ଥରେ ଝଲସେ ତୁମଛବି

ଫେରିଆସ ଥରେ ପ୍ରିୟା ଦେଖିଯିବ

ଆଜିବି ତୋ ବାଟଚାହିଁ ବସିଛି l

ସ୍ବପ୍ନରେ ଆସ ଆଗୋ ଅଳସୀ

ଲାଲଛତା ହାତ ତୁମ ଧରି

ବ୍ୟାକୁଳ ପରାଣ ତୃପ୍ତି ଲଭଇ

କୋକିଳ କଣ୍ଠସ୍ଵର ତୁମ ଶୁଣି l

ଫେଡ଼ିଲେ ନୟନ ସବୁତ ଶୂନ୍ୟ

ମରୁଭୂମି ମରୀଚିକା ପରି ଲାଗେ

ବରଷା ଭିଜାଏ ସିନା ଦେହ

ହୃଦୟ କୁହୁଳି କୁହୁଳି ଜଳେ l

ଲାଗିଗଲେ ଝଡି ସବୁକିଛି ହୁଡ଼ି

ବାତାୟନ ପାସେ ବସିପଡ଼େ

ଭିଜାସ୍ମୃତି ସବୁ ସମ୍ମୁଖ ମୋର

ନୃତ୍ୟ ରଚେ ବର୍ଷା ସାଥେ l