ଭାବନାର କ୍ଷେତ୍ରଫଳ ଭାବନାର ମହକ

ଚେତନ ମନରେ ଜୁଟିଥାଏ କେତେ

ଦିଗନ୍ତ ପ୍ରସାରି ଭାବନା

ଅସୀମିତ ତା'ର ପରିସୀମା ପରା

କେବେ ମାପ କରି ହୁଏନା

ସତ୍ ଚିନ୍ତାରେ

ଥାଏ ଯେବେ କେହି ଭାବୁକ

ତା' ପରିସରର କ୍ଷେତ୍ରଫଳଟିରୁ

ଛୁଟାଏ ଜୀବନେ ମହକ ।

ଭାବନା ସେଠାରେ ହୁଅଇ ସଫଳ

ଦିଗ ଥିଲେ ବି ଭିନ୍ନ ଭିନ୍ନ

ଅଲଗା ଅଲଗା ବାସ ଚହଟାଏ

ହସଇ ଯେମିତି ପ୍ରସୂନ

ଯେତେ ବାଧକ

ଆଗରେ ଆସି ହେଲେ ଠିଆ

ମନ-ପବନରେ ଭାସିଯାଇ ଦୂରେ

ମହକାଇ ପାରେ ଦୁନିଆ ।

ଫୁଲର ମହକ କିଛି କ୍ଷଣ ରହେ

ଭାବନା ବାସ ଚିରସ୍ଥାୟୀ

ହୃଦୟୁ ହୃଦୟ କିଣିନେଇ ପାରେ

ବିଜୟ କେତନ ଉଡ଼ାଇ

କାଳ ବକ୍ଷରେ

ସ୍ବର୍ଣ୍ଣିମ ସ୍ବାକ୍ଷରେ ଉଜ୍ଜ୍ବଳ

ପିଢ଼ି ପରେ ପିଢ଼ି ତା'ର ମହକରେ

ହରଷେ ହୁଅନ୍ତି ବିହ୍ବଳ ।