ବଡ଼ସିଂହାର ବେଶ

ଅବକାଶ ବେଶ ପ୍ରଥମ ବେଶ, ବଡ଼ସିଂହାର

ଶେଷ ବେଶ ପହୁଡ ହୁଏ ଏ ବେଶେ ପ୍ରଭୁଙ୍କର।

ସନ୍ଧ୍ୟାଧୂପ ଶେଷେ ମଇଲମର ନୀତି ବଢଇ 

ଚନ୍ଦନଲାଗି ହେବାପରେ ବଡ଼ସିଂହାର ହୋଇ ।

ପୁଷ୍ପାଳକ ସେବକଗଣ ବଡ଼ସିଂହାର ବେଶ

କରନ୍ତି ପୁଷ୍ପଶୃଙ୍ଗାରର ଏହି ବେଶ ବିଶେଷ ।

ଫୁଲର କରପଲ୍ଲବ କୁଣ୍ଡଳ ତଡ଼ଗିମାନ 

ଶ୍ରୀରାମ ଦାସ ମଠ ଦିଏ ଏଇ ଯୋଗାଡମାନ।

ଫୁଲର ଚନ୍ଦ୍ରିକା ଏମାର ମଠ ଦିଏ ଯୋଗାଇ 

କରପଲ୍ଲବ କୁଣ୍ଡଳ ଚନ୍ଦ୍ରିକାକୁ ବେନିଭାଇ ।

ଧାରଣ କରନ୍ତି ତଡଗି ଚନ୍ଦ୍ରିକା ସୁଭଦ୍ରାଙ୍କୁ

ଲାଗି ହୁଏ କଣ୍ଠ ଭୂଷଣ କହନ୍ତି ଚନ୍ଦ୍ରିକାକୁ ।

ଅଧରମାଳା ଚଉସରା ମାଳା ଲାଗି ହୁଅଇ 

ନାସାରେ ଗୁଣା ନାକୁଆସି ମୁଣ୍ଡେ ଅଳକା ଥାଇ।

ବକ୍ଷଦେଶେ ଶୋହେ ପଦକ ବାରଲାଗି ପାଟରେ

ଗୀତ ଗୋବିନ୍ଦ କେତେ ଧାଡି ବୁଣାଥାଏ ତହିଁରେ ।

ଭୂଷିତ ହୁଅନ୍ତି ଠାକୁରେ ପିନ୍ଧି ବସ୍ତ୍ର ଭୂଷଣ 

ଦେବଦାସୀ ନୃତ୍ଯ ହୁଅଇ ତହିଁ ପରିବେଷଣ ।

ବେଶ ବଢିଲେ ପୁଷ୍ପାଳକ କର୍ପୂର ଆରାତ୍ରିକ 

କରନ୍ତି ବଡ଼ସିଂହାର ଧୂପ କରନ୍ତି ସେବକ ।

ମୋହିନିଏ ମନ ସଭିଙ୍କ ବଡ଼ସିଂହାର ବେଶ 

ଥରେ ହେଲେ ଦେଖ ଆଖିରେ ଦେବଦୁର୍ଲଭ ବେଶ।