ବଡ଼ ବଡୁଆ ହୋ
ବଡ଼ ବଡୁଆ ହୋ
ହେ ପୂର୍ବ ପୁରୁଷ ସ୍ୱର୍ଗେ କାହିଁ ଅଛ
ଆଜି କରୁଛି ଗୁହାରୀ
ପୁରୀ ସିଂହ ଦ୍ୱାରେ ଡାକୁଛି ତୁମକୁ
କାଉଁରିଆ କାଠି ଧରି ।
ଚଟ୍ଟାଣେ ବୋଇତ ମୁରୁଜେ ବନାଇ
ସାତ କୋଠରୀକୁ ଗଢି
ଛଅ କୋଠରୀକୁ ଦ୍ରବ୍ୟରେ ଭରିଛି
ମଝି କୋଠରୀକୁ ଛାଡି ।
ପ୍ରଥମ ତିନୋଟି ଭରି ଦେଇଥାଉ
ତୁଳା ଲୁଣ ସୋରିଷରେ
ଶେଷ ତିନୋଟିରେ ହଳଦୀ ସହିତ
ଶତାବରୀ ଲତା ଚେରେ ।
ମଝି କୋଠରୀରେ ପ୍ରସାଦ ସହିତ
କାଉଁରିଆ କାଠି ବିଡା
ଅଗ୍ନି ସଂଯୋଗରେ ଆହ୍ୱାନ କରୁଛୁ
ଧରାରେ ହୋଇକି ଛିଡା ।
ବଡ଼ ବଡୁଆ ହୋ ବଡ଼ ବଡୁଆ ହୋ
ସ୍ବର୍ଗରୁ ଆସ ଓହ୍ଲାଇ
ଅନ୍ଧାରେ ଆସିଣ ଆଲୁଅରେ ଯାଅ
ମହାପ୍ରସାଦକୁ ଖାଇ ।
ବାଇଶି ପାବଚେ ଗଡି ଗଡି ତୁମେ
ମୋକ୍ଷ ପ୍ରାପ୍ତି କରି ନିଅ
ଜଗାର ଆଶିଷେ ଶ୍ରୀଚରଣେ ତାଙ୍କ
ସର୍ବେ ଲୀନ ହୋଇ ଯାଅ ।