ଗ୍ରୀଷ୍ମ କାଳେ ଅଜା ପାଇଲେ ସଜା

ଗ୍ରୀଷ୍ମ ରୁଦ୍ର ତାପେ ଅଜା ବିକଳ 

           ନାତିକୁ ଧରିକି ମିଳିଲା ବଳ ।

ନଡ଼ିଆ ଚାଞ୍ଚରା ନାତିକୁ ସାଥେ 

         ବାଙ୍କୁଲି ବାଡି଼କୁ ଧରିଲେ ହାତେ ।

ଆମ୍ବ ତୋଟାକୁ ସେ କଲେ ଗମନ 

          ଖାଇବାକୁ ଟିକେ ଥଣ୍ଡା ପବନ ।

ଅଜା ଶୋଇଥିଲେ ଚାଞ୍ଚର ପରେ 

       ନାତି ଶୋଇଥିଲା ତାଙ୍କ କୋଳରେ ।

ପେଟରେ ପଡିଲା ପାଚିଲା ଆମ୍ବ 

        ଥନ୍ତଲା ପେଟରେ ନ ଥିଲା ଦମ୍ଭ ।

ଅଜା ଛାଡୁଥିଲେ ବିକଳେ ରଡ଼ି 

          ନାତି ଧରିଥିଲା ଆମ୍ବକୁ ଭିଡି ।

ନାତିଟା କହିଲା ଅଜା ହେ ଅଜା 

        ଖାଇବାକୁ ଲାଗେ ଆମ୍ବଟା ମଜା ।

ଗଛେ ବସିଅଛି ହନୁ ମାଙ୍କଡ଼ 

         ସେଥିପାଇଁ ଅଜା ଆମ୍ବର ମାଡ଼ ।

ଚାଲ ଚାଲ ମୋର ନାତିଆ ଟୋକା 

        ମନ କରିଦେଲା ଆମ୍ବଟା ଫିକା ।

ପାଚିଲା ଆମ୍ବଟା ତୋ ପାଇଁ ମଜା 

      ତାହାରି ଆଘାତେ ପେଟରେ ସଜା ।

ଦରକାର ନାହିଁ ଥଣ୍ଡା ପବନ 

        ଚାଲିଯିବ ଏଠି ମୋର ଜୀବନ ।

ଅଜା ନାତି ଦୁହେଁ ଫେରିଲେ ଘର 

      କଥା ଶୁଣି ସର୍ବେ ହେଲେ ବିଭୋର ।