BARNALEE

ମେଘମାଳା କୋଳେ ପୁନେଇଁ ଜହ୍ନଟା

     ଓଢଣୀ ଖସାଇ ବସି,

ଶ୍ରାବଣର ଶୋଭା    ନିରେଖୁଛି ହସି

     ସାଜି ସଂଜୁଆ ଅଳସୀ ॥

ଖଦ୍ୟୋତର ହାଟେ  ମରୁଆ ସଂଜଟେ

     ଲାଜେଇ ମୁରୁକି ହସେ,

କଳା ସିଲଟରେ     ପ୍ରତିଛବି ଆଂକି

     ପୀରତି ମହ୍ଲାର ଘୋଷେ ॥

ପତଂଗେ ଭ୍ରମନ୍ତି    ବାଇ ପ୍ରାୟ ନିତି

     ଅନଳେ କରି ପୀରତି,

ପକ୍ଷଚ୍ୟୁତ ହୋଇ    ଲଭନ୍ତି ନିର୍ବାଣ

      ପ୍ରକୃତିକୁ କରି ରତି ॥

ହଂସ ହଂସରାଳି    କରୁଥାନ୍ତି କେଳି

      ପହିଲି ଶ୍ର‍ାବଣ ଧାରେ,

Advertisement

ଗେଣ୍ତା ପୀରତିରେ    ମଧୁର ମିଳନ

     ଶୀତଳ ସରସୀ ନୀରେ ॥

ବଂଶୋଦ୍ଭବେ ଜଳ- ଜୀବଂକର ମେଳ

      ପ୍ରକୃତିର ମହାଖେଳ,

ଅଂକୁରୋଦ୍ଗମର    ନବ ବାରବାଟୀ 

      ନିୟତିର ମହାମେଳ ॥

ଚର୍ଚ୍ଚିତ ମାଧୁରୀ    ମର୍ତ୍ତ୍ୟ ମହାପୁରୀ

     ବର୍ଣ୍ଣିଳ ଅାଭା ସୁନ୍ଦରୀ,

ଉପମା ଗଭାରେ  ସୃଜନ ଶୋଭାରେ

    ନୃତ୍ୟାଂଗନା ମର୍ତ୍ତ୍ୟପରୀ ॥

ସୁନ୍ଦର ତୃପ୍ତିରେ    ହସେ ମହୀପୁର

     ସକଳ ପ୍ରାଣୀଂକୁ ନେଇ,

ବାରୁଣେଇ ସାଜି   ବାରୁଣୀରେ ହଜି

     ବାଣ୍ଟେ ଅମୃତ ମଣୋହୀ ॥