ବାୟା ବସା
ବାୟା ବସା
ବିଚିତ୍ର ବିନ୍ଧାଣୀ ଟିକି ଟିକି ଡେଣା
ଧନ୍ୟ ତୋତେରେ ଗଢିଛି ବିହି
ତାଳ ଗଛ ଡାଳେ ନିର୍ଜନ ସ୍ଥାନରେ
ବସା ତୋର ବାନ୍ଧୁ ବାୟା ଚଡେଇ l
ଝଡ଼ ପବନକୁ ନଥାଏ ତୋ ଡର
ବସା ତୋର ଧୀରେ ଦୋଳି ଖେଳଇ
ଘାସ କୁଟା ନେଇ କି କାରୁକାର୍ଯ୍ୟରେ
ଗୁନ୍ଥି ଥାଉ ତାକୁ ଚଞ୍ଚୁରେ ନେଇ l
ଟିକି ଟିକି ଛୁଆ ଦୋଳି ଖେଳୁଥାନ୍ତି
ବସାଟି ଭିତରେ ମୁହଁ ଦେଖାଇ
ଚାଲିଯିବା ଲୋକ ଦଣ୍ଡେ ରହିଯାଏ
ବସାକୁ ତୋହର ଦେଖିବା ପାଇଁ l
ଉଚ୍ଚ ଗଛ ଦେଖି ତାଳ ଗଛ ଟିକୁ
ବସା ବାନ୍ଧୁ ଭାବି ଉତ୍ତମ ସ୍ଥାନ
ଗୋଟିଏ ଗଛରେ ଅନେକ ବସାରେ
ଦିଶୁଥାଏ ସତେ କେଡେ ସୁଷମ l
ଦଳବଦ୍ଧ ହୋଇ ରହିଥାଅ ତୁମେ
ଖାଦ୍ୟ ଅନ୍ୱେଷଣେ ଯାଅ ଦୂରକୁ
ସନ୍ଧ୍ୟା ଆଗମନେ ଫେରି ଆସିଥାଅ
ଶବଦେ ପୁରାଇ ସେହି ସ୍ଥାନକୁ l
କ୍ଷେତ ବାଡିରୁ ଶସ୍ୟ ଦାନା ଖୋଜି
ଆହାର ତୁମର କର ସଂଗ୍ରହ
ନ ମିଳିଲେ କିଛି ବଞ୍ଚିବେ କିପରି
ନିରୀହ ପକ୍ଷୀଟି ଲାଗେ ସଂଶୟ l
ଗଛ ସଂଖ୍ୟା ଏବେ କମି କମି ଯାଏ
ବିପଦେ ପଡଇ ତୁମ ଜୀବନ
ହେ ବିଶ୍ୱକରତା ରକ୍ଷା କରିବ କି
ବାୟା ଚଢେଇର ସୃଷ୍ଟି ମହାନ l