ଅନ୍ଧ ବିଶ୍ୱାସ

ଯୁକ୍ତିଯୁକ୍ତ ତଥ୍ୟ ପ୍ରମାଣ ନଥାଇ

ବିଶ୍ୱାସ କରୁ ଯାହାକୁ,

ଅନ୍ଧ ବିଶ୍ୱାସଭାବେ ଜଣାଶୁଣା

କହିଥାନ୍ତି ଲୋକ ତାକୁ l

ସମାଜ ମଧ୍ୟରେ ଅନେକ ଯେ ପ୍ରଥା 

ଏହି ଭଳି ପ୍ରଚଳିତ,

ସଭ୍ୟ ଜଗତର ଆଚରଣ ଦେଖି

ହୋଇଥାଉ ମର୍ମାହତ l

ଉଆଁସ ତିଥିରେ ଜନମିଲା ଝିଅ

ବିବାହରେ ବାଧା ଆସେ,

ସମାଜରେ ଅପନିନ୍ଦା ପାଇଥାଏ 

ମିଛରେ ଜନମ ଦୋଷେ l

ଯିବା ପଥେ ଯଦି ଅତିକ୍ରମ କରେ

ବିଲେଇ ରାସ୍ତାରେ ଆମ,

ଆମେ ଭାବିଥାଉ ଯିବା ନାହିଁ ଆଉ

ବିଗିଡି ଗଲାଣି କାମ l

ତନ୍ତ୍ର ମନ୍ତ୍ର ଆଉ ଗୁଣୀ ଟୁଣୀ ନାମେ

ଚାଲେ ହତ୍ୟା ବିଭୀଷିକା,

ଅନ୍ଧ ବିଶ୍ୱାସର ଜାଲେ ଛଟପଟ

ଶକ୍ତିହୀନ ପ୍ରାଣୀ ଏକା ।

ସର୍ପାଘାତ ଅବା ରୋଗଜାତ ହେଲେ 

ଡାକ୍ତର ଖାନା ନଯାଇ,

ଝଡା ଫୁଙ୍କା ଆଦି କରୁଥାନ୍ତି ନେଇ

ଅନ୍ଧ ବିଶ୍ୱାସ ର ପାଇଁ l

ଠାକୁରାଣୀ ଙ୍କର ନାମରେ ମିଛରେ

ପକାଇଥାଆନ୍ତି ବଳୀ,

ସବୁ ପ୍ରାଣୀ ଠାରେ ଈଶ୍ୱରଙ୍କ ବାସ

ତାହାକୁ ଯାଆନ୍ତି ଭୁଲି l

ଅନ୍ଧ ବିଶ୍ୱାସର ପ୍ରଚାର ପ୍ରସାର

ସମାଜରେ କର ନାହିଁ,

ବିଚାର ସମ୍ମତ ବିଜ୍ଞାନର ବାର୍ତ୍ତା

ମାନ ବିବେକ ଖଟାଇ l