ସାବଧାନତା

ସାବଧାନତାର ଅଙ୍କୁଶଟି ଲୋଡ଼ା

ଜୀବନର ପ୍ରତି କାଳେ,

ନୀତି ନିୟମର ନିଗଢ଼ ବନ୍ଧନେ

ସଂସାର ନଉକା ଚଳେ l

ଖାଦ୍ୟ ଗ୍ରହଣ ରେ ଅସାବଧାନ ରେ

ଶରୀର ହୁଏ ଅସୁସ୍ଥ,

ଅତି ଖାଦ୍ୟ ଅବା ଦୂଷିତ ଖାଦ୍ୟକୁ

ଗ୍ରହଣ ନୁହେଁ ଉଚିତ l

ରାସ୍ତାରେ ରହିବା ସାବଧାନ ସଦା

ଗମନାଗମନ ବେଳେ,

ରାସ୍ତାରେ ବିପଦ ହୁଏନି ସମ୍ଭବ 

ନିୟମ କୁ ମାନୁଥିଲେ l

ଦୀପାବଳି ବେଳେ ସାବଧାନତାରେ 

 ବାଣ ଆଦି ଫୁଟାଇବା,

ନିଜ ଅଙ୍ଗ ଠାରୁ ଦୂରେ ରଖି ତାକୁ

ପ୍ରଜ୍ଜଳିତ କରୁଥିବା l

ବାକ୍ୟରେ ସଂଯମତା ନରହିଲେ

ଶୁଣିବା ଲୋକ କୁ କଷ୍ଟ,,

ଶବ୍ଦ ମାନଙ୍କ ର ସତର୍କ ପ୍ରୟୋଗେ 

ବନ୍ଧୁତ୍ୱ ହୁଏନି ନଷ୍ଟ l

ପାକ କ୍ରିୟା ହେଉ ଅବା କଟା କଟି 

ସାବଧାନ ସବୁଠାରେ,

ହାତ କଟିଯିବା ଅବା ପୋଡିହେବା

ବିପଦରୁ ରକ୍ଷା କରେ l

ବରଷା ଦିନରେ ଖସଡ଼ା ସ୍ଥାନରେ

ଚାଲିବା ସହଜ ନୁହେଁ,.

 ସାବଧାନଯଦି ନହୋଇବା ତହିଁ

ପଡିଯିବା ଭୟ ଥାଏ l

ବାଳୁତ ବେଳେ ବା ବୟସ ଆଧିକ୍ୟେ

ସାବଧାନ ନହୋଇଲେ,

ପଡିଯାଇ ଶରୀର ର କ୍ଷୟ କ୍ଷତି

ବିପଦ ଟି ସର୍ବ କାଳେ l

ଯୌବନ କାଳରେ ଚଞ୍ଚଳ ମନଟି

ପାଦ ଖସିଯିବା ଭୟ,

ମନସ୍ଥିର କରି ବିବେକ ଖଟାଇ 

ଚଳିଲେ ହୁଅଇ ଜୟ l

ସାବଧାନ ହେବା ଶିଖାଇ ଥାଆନ୍ତି

ଗୁରୁ ଗୁରୁଜନ ମାନେ,

ତାଙ୍କ କଥାମାନି ଚଳିଲେ ସଭିଏଁ

ବାଧା ନ ଆସେ ଜୀବନେ l