ସୁନେଲି କ୍ଷେତ

ହେମନ୍ତ ର ଶେଷେ ଶୀତ ଆସିଯାଏ

ପାଚିଯାଏ କ୍ଷେତେ ଧାନ,

ସୁରମ୍ୟ ଦିଶଇ ପ୍ରକୃତି ଆମର

ଆହାକି ହଳଦୀ ବର୍ଣ୍ଣ l

ସୁନେଲି ଦିଶଇ କ୍ଷେତ ବାଡ଼ି ସବୁ

ସୁନା ଫସଲକୁ ଧରି,

ପବନରେ ଧୀରେ ଦୋହଲୁ ଥାଏସେ

ଯେସନ ସ୍ବର୍ଣ୍ଣ ଲହରୀ l

ପକ୍ୱ ହୋଇଥାଏ ଧାନ ଗଛପରେ

ଦେଖି ଲାଗୁଥାଏ ଖୁସି,

କୃଷକ ଭାଇ ଟି ସଜବାଜ ହୁଏ

ଅମଳ କରିବ ହସି l

ଖଳା ସଫା କରି ଧାନକୁ ବାଡେଇ

ବରଷକ ପାଇଁ ରଖେ,

ମାଆ ଲକ୍ଷ୍ମୀ ଙ୍କର ଚିତା ଝୋଟି ଆଙ୍କି

ପ୍ରଣମେ ତାଙ୍କରି ପାଖେ l

ପକ୍ଷୀ ମାନଙ୍କର ମେଳ ଲାଗିଯାଏ

ଧାନ ଖୁଣ୍ଟି ଖାଇବାକୁ,

ପ୍ରକୃତି ଖଞ୍ଜିଛି ଯାହାକୁ ଯେପରି

ପ୍ରାଣ ତାଙ୍କ ବଞ୍ଚିବାକୁ l

ସୋରିଷ କ୍ଷେତରେ ଫୁଲ ଫୁଟିଥାଏ

ହଳଦୀ ରଙ୍ଗ କୁ ଧରି,

ସୁନାର ଅଳସୀ ଅଳସ ଭାଙ୍ଗଇ 

ଦକ୍ଷିଣା ଞ୍ଚଳେ ଆମରି l

ହଳଦୀ ରଙ୍ଗରପାଟ ପିନ୍ଧିଛିକି

ସତେ ଆମ ମାଟି ମାଆ,

କିସୁନ୍ଦର ଦିଶେ ପ୍ରକୃତି ଆମର 

ଉତ୍ତର ରୁ ବହେ ବାଆ l

କୃଷିପ୍ରଧାନଆମ ରାଜ୍ୟ ଓଡିଶା ଟି 

ମୁଖ୍ୟ ଫସଲ ତା ଧାନ,

ଧାନରୁ ଚାଉଳ ବାହାର ହୁଅଇ

ଚାଉଳରୁ ହୁଏ ଅନ୍ନ l

ପଶ୍ଚିମଓଡିଶା ନୂଆ ଚାଉଳରେ

ନୂଆ ଖାଇ ପର୍ବ ମାନେ,

ମାର୍ଗଶିର ମାସେଲକ୍ଷ୍ମୀ ସେର ବସେ 

ଉପକୂଳେ ନୂଆ ଧାନେ l

ମାଆ ଲକ୍ଷ୍ମୀଙ୍କର ଅତି ପ୍ରିୟ ଅଟେ

ହଳଦୀ ରଙ୍ଗଟି ପରା,

ପ୍ରକୃତି ସଜାଇ ରଖିଛି ସେପାଇଁ

ହଳଦୀ ଫୁଲ ପସରା l