ବାରଣ ଜମା ନ କର

ତୁମଲାଗି ଆଜି ଲୁଚାଇ ଆଣିଛୁ

ଦୁଧ,ଦହି,ଛେନା-ସର ,

ମନଭରି ଏବେ ଖାଅ ହେ ମୋହନ

ବାରଣ ଜମା ନ କର ।

ସଖାମେଳେ ତୁମେ ଲୁଚି ଛପି ଆସି

ଆମ ଘରୁ କର ଚୋରି ,

କେଡ଼େ କଉଶଳେ ସର ,ଲବଣୀକୁ

ଖାଅ ହେ ମୁରଲୀଧାରୀ । 

ସେଥିପାଇଁ କେତେ ଗାଳିମନ୍ଦ ଶୁଣୁ

ଲାଗେ ତେଣୁ ଭାରି ଡର ,

ଘର ଲୋକଙ୍କର ଚାପରେ ପଡ଼ିକି

ଯାଉ ଯଶୋଦାଙ୍କ ଠାର ।

ତୁମ ନାମେ ସିନା ଅଭିଯୋଗ କରୁ

ମନରେ ନ ଥାଏ କିଛି ,

ଜାଣିଛ ହେ ଶ୍ୟାମ ,ତୁମପ୍ରତି ଆମ

ଚିତ୍ତେ କେତେ ପ୍ରେମ ଅଛି ।

ସେଇ ପ୍ରେମ,ଭକ୍ତି, ଭରସା ନେଇକି

ଆସିଅଛୁ ତୁମ ପାଶ ,

ମନଇଚ୍ଛା ଏବେ ଭୁଞ୍ଜ-ପାନ କର

ସର,ଲବଣୀ,ଗୋରସ ।