ବାପା

  ବାପା ଆବୃତ୍ତି କରନ୍ତି

ମୋ ଜୀବନ ପଛେ ନର୍କେ ପଡିଥାଉ

ବାପା କହନ୍ତି ଯାହାକୁ ଯେତିକି ପ୍ରାପ୍ତି

ସବୁ କଥାକୁ ଠାକୁର ଅଛନ୍ତି

ସହିବାକୁ ହେବ ଦୁଃଖ ଯାତନାର ଦାଉ

ବାପା କହନ୍ତି ଆହୁରି କେତେ କଥା

ଛଅମାଣ ଆଠଗୁଣ୍ଠ ଡାକମୁନସୀ ଅବୋଲକରା ଗପ

ବୋଉ କହେ ବାପା ତୁମର କୁହୁକ ଦୀପ

ଦୋ ଫସଲି ଧାନ ମୁଗ ବିକା ଖଳାବାରି

ଆମ୍ବ ପଣସ କାଜୁ ବଗିଚା ମାଛ ପୋଖରୀ

ପୁନିଅ ପରବ ବାହା ନିମିତ୍ତ ବନ୍ଧୁ କୁଣିଆ ଦିଆନିଆ

ହିସାବ କିତାବ ଜିଭ ଆଗରେ ଥୁଆ

ନଦୀ କୂଳ ଲଙ୍ଘିବା ଆଗରୁ ବାଡ ପକାନ୍ତି ବାପା

ହାତକୁ ହାତ ମିଶାନ୍ତି

ବୁଝାମଣାର ଗଣ୍ଠି ପକାନ୍ତି

ପିଆଲା ପିଆଲା ଦୁଃଖ ଅଚାନକ ଢ଼ୋକି ନିଅନ୍ତି

ବାପା ଦିଶୁଥାନ୍ତି ନିର୍ବିକାର

ସମୁଦ୍ର ଭିତରେ ବତୀଘର

ଆଜି ଭାରି ନିଜର ଲାଗେ ବାପାଙ୍କ ହସ୍ତାକ୍ଷର

ଫୁଲ ବଗିଚା ପୁରୁଣା ଜାମା ଚାଦର

ଅପହଞ୍ଚ ଦୂରତାରେ ବାପା ଦିଶୁଥାନ୍ତି ଆକାଶର ତାରା

ମୁଠା ମୁଠା ସ୍ମୃତିର ପସରା

ଫଟୋ ପାଖରେ ଦୀପ ଥୁଆ ହୁଏ

ଶ୍ରାଦ୍ଧ ଦିବସରେ ବାପା ଆସନ୍ତି ସାହି ଭାଇ ଗହଣରେ

ପିଣ୍ଡ ଦାନ ଉତ୍ସବରେ ଆଦୃଶ୍ୟରେ

ଆଉ ଥରେ ଅଭିଷେକ ହୁଅନ୍ତି ବୋଉ ଆଖିର ଲୁହରେ

ଶୂନ୍ୟ ମନ୍ଦିରରେ