ଝିଅ ବିଦା

ଝିଅ ବିଦା ବେଳ ହୋଇଲା

ବୋଲେ ହୁଁ ଟି 

ବାପ ଘର  ସୁଖ  ସରିଲା 

ବୋଲେ ହୁଁ ଟି |

କନିଆ କୁ  ବେଗେ ଆଣ ଲୋ

ଶଙ୍ଖ  ହୁଳହୁଳି ଦିଅ ଲୋ

ଶୁଭ ବେଳ ଯିବ ଗଡିଟି  ବୋଲେ ହୁଁ ଟି

ଶାଶୁ ଘର  ଯାଏ  ଝିଅଟି |

ନଣନ୍ଦ  ପୁଟୁଳି ସଜାଅ

ବଡ  ଭାଇନା ଙ୍କୁ  ଡକାଅ

ତର ତର  ହେଲେ  ସମୁଦୀ  ବୋଲେ ହୁଁ ଟି

ବସିବାକୁ ବେଳ ନାହିଁଟି |

ସଙ୍ଗାତ  ମକର  ବଉଳ

ସାହି ପଡିଶା ର ଗହଳ

ବିଦାୟ ନେଉଛି ଝିଅଟି  ବୋଲେ ହୁଁ ଟି

ବାପ  ଘର ସ୍ମୁତି ସାଉଁଟି |

ଛାତିରେ  ରଖେ  ମାଆ ପଥର

ଝିଅ  ବିଦା କେଡେ କଠୋର

କେତେ କଥା  ରହେ  ଗୋପନ ବୋଲେ ହୁଁ ଟି

ସରି  ସରି ଯାଏ ସପନ  |

ଝିଅ ତ ଗୋଟିଏ କବିତା

ସାଜଇ  ସେ ଲତା  ବନିତା

ପର  ଘର  ହେବ ନିଜର  ବୋଲେ ହୁଁ ଟି

ରୂପ ସାଥେ  ଗୁଣ  ସୁନ୍ଦର |

ଶାଶୁ ଘର  ପାଖ  ହୋଇଲା

ପୂର୍ଣ୍ଣ କୁମ୍ଭ  ଥୁଆ  ସରିଲା

ଅହ୍ୟ ସୁଲକ୍ଷଣୀ  ଆସନ୍ତି ବୋଲେ ହୁଁ ଟି

ବୋହୂ କୁ ବନ୍ଦାଣ  କରନ୍ତି |

ବନ୍ଧୁ  କୁଣିଆ ଙ୍କ ଆସର

ଭୋଜି ଭାତ  ଭାର  ବେଭାର

ଘର ଲାଗୁଥାଏ ମନ୍ଦିର  ବୋଲେ ହୁଁ ଟି

ସାକ୍ଷୀ ସିନା କଳା  ଠାକୁର |