ଅତୀତରୁ କିଛି

ବର୍ଷା ,ତୁମକୁ ଦେଖି ଏବେ ହସ ଲାଗୁଛି

ଯେବେ ଅତୀତର ସେହି କିଛି କଥା ମନେ ପଡୁଛି

ଭାବି ଭାବି ହସି ହସି ଟିକେ ଉଦାସ ହେଉଛି

କାରଣ ,ସେହି ଦିନ ଏବେ ଚାଲି ଯାଇଛି |

ମନେ ପଡୁଛି ଟିମ୍ର ଏହି ଟୁପୁର ଟୁପୁରୁ ସ୍ୱର

ଆଉ ତୁମର କେବେ କେବେ ମୁଷଳ ଧାର

ତୁମ ସେହି ଝରିବା ସଙ୍ଗେ ମୋର ଭିଜିବାର

ଆଉ ଭିଜି ଭିଜି ତୁମ ସଙ୍ଗେ ଖେଳିବା କଥାର |

କେବେ କେବେ ତୁମେ ବି ଖେଳୁଥିଲ

ଝିପି ଝିପି ବରଷି, ପୁଣି ରହି ଯାଉଥିଲ

ସତେକି ଯେମିତି କିଛି ପ୍ରସ୍ତୁତି କରୁଥିଲ

ପୁଣି ବରଷି ସମସ୍ତଙ୍କୁ ଯେମିତି ଆହ୍ୱାନ ଦେଉଥିଲ ।

କେହି କେହି ତୁମକୁ ଡରି ବି ଯାଉଥିଲେ

କେବେ ଚାଟ ଆଉ ବର୍ଷାତିର ସାହାରା ନେଉଥିଲେ

ତୁମଠାରୁ ନିଜକୁ ଦୁରେଇ ରଖୁଥିଲେ

ତୁମ ସହ ଭିଜିବାକୁ କେତେ ଡରୁଥିଲେ ।

ମୋତେ କିନ୍ତୁ କେବେ ଭଲ ଲାଗୁ ନଥିଲା

ଛତା ଆଉ ବର୍ଷାତି ମୋର ପାଖ ପଶୁନଥିଲା

ଯଦି କେହି ମୋତେ ଆକଟ କରୁଥିଲା

ମନଟା ମୋର ପୁରା ଫିକା ପଡି ଯାଉଥିଲା |

ଭାବୁଥିଲି ,କାହିଁକି ତୁମପାଇଁ ଏତେ କଟକଣା

ବୋଧହୁଏ ତୁମ ସଙ୍ଗେ ଭିଜିବାର ମଜା ନଥିଲା ଜଣା

କିମ୍ବା ତୁମର ମାୟା ସବୁ ଥିଲା ତାଙ୍କୁ ଜଣା

ତଥାପି ହେଉନଥିଲି ମୁଁ କେବେ ବାଟବଣା |

ହେଲେ ମୁଁ ଥିଲି ସେ ସବୁରୁ ଦୂରରେ

ନାଚୁଥିଲି ତୁମ ସଙ୍ଗେ ଭିଜି ବଡ଼ ଆନନ୍ଦରେ

ଦେଖୁ ଦେଖୁ ସେହି ଦିନ ଲୁଚିଗଲା ଅତୀତରେ

ଏବେ ତୁମକୁ ଲୁଚୁଛି ଏହି ବୟସର ଚାପରେ |

କିନ୍ତୁ ,ମୋର ସେହି ଅନୁଭୂତି ସାଇତି ରଖିଛି

ତୁମକୁ ଏବେବି ଦେଖି ,ମୁଁ ଭାବୁଛି

ଫେରିବାନି ସେହି ଦିନ ଜାଣି ,ଉଦାସ ହେଉଛି

ମୋର ତୁମ ସଙ୍ଗେ ସେହି ଅନୁଭୂତି ଅତୀତ ହୋଇଛି |