ଅଧୁରା ସ୍ୱପ୍ନ

କୃତ୍ରିମ ଉଦ୍ୟାନେ ପ୍ରଭାତ ଭ୍ରମଣ କ୍ଲାନ୍ତି ମେଣ୍ଟାଇବା ଆଶେ 

ବସିଗଲି ମୁହିଁ ଘାସ ଗାଲିଚାରେ ଚାହୁଁଥିଲି ଚଉପାଶେ 

     ଅନତି ଦୂରରେ ଆସି 

ଅଟକିଲେ ଜଣେ ତନ୍ଵୀ ତରୁଣୀ ଅପରୂପା ଶୋଭାରାଶି |(1)

ବୟସ ତିରିଶ ଚାଳିଶ ମଧ୍ୟରେ ଉଛୁଳୁଛି ଯଉବନ 

କାମ ପସରା କି ଥୋଇ ଦେଇଗଲା ଭ୍ରମରେ ମୀନକେତନ 

      ଗୋଲାପୀ ଅଧରେ ହାସ 

କୁନ୍ଦ ଦନ୍ତପନ୍ତି ଆହା କି ସୁନ୍ଦର ଘନକୃଷ୍ଣ କେଶପାଶ |(2)

ରୂପ ରାଇଜର ଅପରୂପା ପରୀ ସତେ ଅବା ବାଟ ଭୁଲି 

ଚଳାଖଞ୍ଜନାକ୍ଷୀ ହେମ ଚମ୍ପାଗୋରୀ ଆସିଛି ଆରାମ ବୁଲି 

      ଅପଲକ ନେତ୍ରେ ଚାହିଁ 

ଆପାଦମସ୍ତକ ରମ୍ୟ ଅବୟବ ସଉଷ୍ଠବେ ହେଲି ବାଇ |(3)

କଣେଇ କଣେଇ ଚାହୁଁଥିଲା ସିଏ ଅଳପ ଅଳପ ହସି 

ଉଲ୍ଲସି ଉଠିଲା ତନୁ ମନ ମୋର ସପନରେ ଗଲି ଭାସି 

     ଏକାକୀ ରହିଛି ବାଳା 

ପତି ଅବା ସାଥି ନାହାଁନ୍ତି ସାଙ୍ଗରେ ଖୋଲାଅଛି ଚିତ୍ରଶାଳା |(4)

ପେଟ ଅଣ୍ଟା ପିଠି ଦିଶେ ଅଧା ଫୁଟି ଚାରୁ ପୀନ ପୟୋଧର

ସୁନେଲି ଶାଢ଼ୀକୁ କାଳିଆ କାଞ୍ଚଲା କାମ କଳା ଗନ୍ତାଘର 

     ମଣେ କୋଟି ଭାଗ୍ୟଫଳ 

ଏ ରୂପଲତାକୁ ମନେ ଆଙ୍କିବାକୁ ବ୍ୟଗ୍ରେ ହେଲି ଅଗ୍ରସର |(5)

ଅଧା ଦରଶନ ତୃପ୍ତ ନାହିଁ ମନ କାହିଁ ଚାଲିଗଲା ଖରେ 

ଯେତିକି ଆଙ୍କିଛି ସେତିକି ରଖିଛି ଆଜି ମନ ଦର୍ପଣରେ 

      ଭାସେ ଆଶା ନଈ ଧାରେ 

ବାର୍ତ୍ତାଳାପ ଟିକେ କରି ପାରିଲିନି ସ୍ୱପ୍ନ ରହିଲା ଅଧାରେ |(6)