ଅଧୁରା ପ୍ରେମ
ଅଧୁରା ପ୍ରେମ
କିଛି କଥା ପ୍ରିୟ
ରହିଗଲା ବାକି
ସମୟ ତ ହେଲା ନାହିଁ
ଯେଉଁ ଦୁଇ ପଦ
କଥା ହେଉ ଥିଲି
ମନ ପଛେ ଟାଣୁ ଥାଇ ।
ହାଟ ମଝିଟାରେ
ଅଚାନକ ଦେଖା
ଚାହିଁ ଥିଲେ ପରା ଲୋକ
ସିଏ କି ବୁଝିବେ
ଦୀର୍ଘ ଦିନେ ଦେଖା
ସେଥିରେ କେତେଟା ଭୋକ ।
କେତେ ଲୋକଙ୍କର
ସନ୍ଦେହ ଆଖିଟା
ଘୁରୁ ଥିଲା ନିଆଁ ପରି
କହିବା କଥାଟା
ଗଳାରେ ଅଟକେ
ମନ ଯାଉ ଥିଲା ମରି ।
ତୁମ ଆଖିକୁ ମୁଁ
ଆଖି ନମିଶାଇ
ଭୂମି କଲି ବିଦାରିତ
ମୋ ଅନ୍ତର ସ୍ନେହ
ଉତ୍ସର୍ଗ ନକରି
ସାଜିଛି ଯନ୍ତ୍ରଣା ସ୍ରୋତ ।
ଚିର ଦିନ ପାଇଁ
ସ୍ମୃତି ପାଲଟିଲା
ହାଟ ହେଲା ପ୍ରେମ ଘାଟ
ଯେଉଁଠି କେବଳ
ବିନା ଅନଳରେ
ଜୀବନଟା ଛଟପଟ ।
ହୃଦୟରେ ଲେଖି ସେହି ଦୃଶ୍ୟାବଳୀ
ସାଇତି ରଖିଛି ମୋହେ
ଭିନ୍ନ ଏକ ରାଜ୍ୟେ
ଦେଖା ହେଉ ମିତ
ଜନସ୍ରୋତେ କେବେ ନୁହେଁ ।