ଅଭୂଲା ସ୍ମୃତି

କେଉଁ ରାଇଜକୁ ଚାଲିଗଲ ପ୍ରିୟା

ନ ଦେଇ ତୁମ ଠିକଣା,

ବରଷା ରାତିରେ ତୁମେ ମନେ ପଡ଼

ମନ ହୁଏ ବାଟବଣା ।

ପହିଲି ଦେଖାରେ ଭଲ ପାଇଥିଲି

ତୁମେ ଦେଇଥିଲ କଥା,

ସାଥି ହୋଇ ଆମେ ଜୀବନ ଜିଇଁବା

ନ ଦେଇ ଆନକୁ ବ୍ୟଥା ।

ରୂପା ଜହ୍ନପରି ତୋଫା ଗୋରାଦେହ

ମୋ ମାନସେ ଭାସିଯାଏ,

ପିକରାବ ସମ କଣ୍ଠସ୍ଵର ତବ

ଅନ୍ତକର୍ଣ୍ଣେ ଶୁଭିଯାଏ ।

ବର୍ଷାଭିଜା ତୁମ ଶାଢୀପିନ୍ଧା ଦେହ

ଏବେବି ସ୍ମୃତିରେ ଭାସେ,

ନାଲି ଓଷ୍ଠ ସଙ୍ଗେ ଗଭାର ଗଜରା

ଭାବନାରେ ଫୁଟିଦିଶେ ।

କାହିଁକି କିପାଇଁ ଏତେ ଅଭିମାନ

କରି ଛାଡି ଚାଲିଗଲ,

ଅତୀତ ଦିନର ଅଭୂଲା ସ୍ମୃତିକୁ

କେମିତି ପାଶୋରି ଦେଲ ।

କି ଦୋଷ ଦେଖିଲ ମୋହର ହେ ପ୍ରିୟା

ଇଚ୍ଛା ତୁମ ମଉଳିଲା,

ଜୀବନସାରା ମୁଁ ସୁଖରେ ରଖିବି

ଫେରିଆସ ତୁମେ ଭଲା ।