ଆମ ଗଣତନ୍ତ୍ର
ଆମ ଗଣତନ୍ତ୍ର
ସ୍ବରାଜ ଓ ସୁରାଜର ସ୍ଲୋଗାନରେ
ପଥଭ୍ରଷ୍ଟ ନୈତିକ ମୂଲ୍ୟବୋଧ
ବଂଶବାଦୀ ବାହୁବଳୀ ନ୍ଯସ୍ତସ୍ବାର୍ଥୀଙ୍କ
ନାଗଫାଶରେ ରାଷ୍ଟ୍ର ନୀତି କବଳିତ l
ଶ୍ରେଣୀହୀନ ସମାଜର ସୁନେଲି
ସବୁଜ ସ୍ବପ୍ନ ସୁଦୂର ପରାହତ
ଉଗ୍ରବାଦ ଓ ଆଞ୍ଚଳିକବାଦର
ଗରଳ ଜ୍ୱାଳାରେ ଅଖଣ୍ଡତା ଜର୍ଜରିତ l
ଅନାହାର କୁପୋଷଣର କଷଣରେ
ସଢୁଛି ଏଇ ଦେଶର ଭବିଷ୍ୟତ
କତିପୟ ଧନାଢ୍ୟ ବ୍ଯାପାରୀ ହସ୍ତେ
ନ୍ଯସ୍ତ ଜାତିର ସକଳ ସମ୍ପଦ l
ସଂରକ୍ଷଣବାଦର କୁପ୍ରଭାବେ ପ୍ରବାସେ
ଶରଣାର୍ଥୀ ସାଜିଛି ମେଧାବୀ ଭୂମିପୁତ୍ର
ନାଗରିକର ବ୍ଯକ୍ତିଗତ ସ୍ବତନ୍ତ୍ରତାରେ
ସରକାରୀ କଳର ଅବାଧ ହସ୍ତକ୍ଷେପ l
ସ୍ବାଧୀନଚେତା ନିରପେକ୍ଷ ବିଜ୍ଞ ବ୍ଯକ୍ତି
ଦେଶଦ୍ରୋହୀର ଆଖ୍ୟାରେ ସମ୍ମାନିତ
ଭୋଟବ୍ୟାଙ୍କ ରାଜନୀତିର ପଶାପାଲିରେ
ମହାନ ସମ୍ବିଧାନ ନ୍ୟାୟଶାସ୍ତ୍ର ଭୂଲୁଣ୍ଠିତ l
ମୁଦ୍ରାସ୍ଫୀତିର ତାଡ଼ନାରେ ତ୍ରାହି ତ୍ରାହି
ଡାକଇ ମେହନତୀ ଖଟିଖିଆ ମଣିଷ
ଭ୍ରଷ୍ଟାଚାରର ମହାମାରୀରେ ସଭିଏଁ
ବିଶେଷ ଆକ୍ରାନ୍ତ ବିବଶ ସର୍ବସ୍ବାନ୍ତ l
ବିଶ୍ବର ସର୍ବବୃହତ୍ତ ଗଣତାନ୍ତ୍ରିକ ରାଷ୍ଟ୍ର
ଭାବେ ତଥାପି ଆମେ ସମସ୍ତେ ଗର୍ବିତ
ସମୃଦ୍ଧ ସଶକ୍ତ ସାର୍ବଭୌମତ୍ବର ଆଶାରେ
ଭାରତବର୍ଷର ଅନ୍ତରାତ୍ମା ଆଜିବି ଜୀବିତ ll