ବାବାଶ୍ରୀ ଗଣେଶ

ଭାଦ୍ରବ ମାସର ପୁଣ୍ୟ ଶୁକ୍ଳ ପକ୍ଷେ 

  ଗଣେଶ ଚତୁର୍ଥୀ ପଡ଼େ

ମହା ଆନନ୍ଦରେ ଗଣେଶଙ୍କ ପୂଜା 

  ହୁଏ ଭକ୍ତ ଜନ ଭିଡ଼େ l

ମସ୍ତକେ ତିଳକ କନ୍ଧରେ ପଇତା 

  ଆହେ ପ୍ରଭୁ ଏକଦନ୍ତ

ଅନ୍ଧାର ପଥର ତୁମେ ହିଁ ଆଲୋକ 

  ବିଦ୍ୟାପତି ଦୟାବନ୍ତ l

ହେ ଗୌରୀନନ୍ଦନ ବିଘ୍ନ ବିନାଶନ 

  ଗୁଣନିଧି ଗଜାନନ 

କାର୍ତ୍ତିକେୟ ଭ୍ରାତା ବାବା ଶ୍ରୀଗଣେଶ 

  ଜ୍ଞାନଦାତା ଭଗବାନ l

ବିବାହ ବ୍ରତରେ ଆଗ ତୁମ ନାମ 

  ତୁମେ ତ ଜଗତ ଜିତା 

ସବୁ ଯାଗଯଜ୍ଞେ ପ୍ରଥମ ଦୀପରେ 

  ଆଗ ହୁଏ ତୁମ ପୂଜା l

ମମତାସୁରକୁ ବଶୀଭୂତ ପାଇଁ 

  ତୁମେ ହେଲ ବିଘ୍ନରାଜ

ଅହଂକାର ଛାଡି ମୂଷିକଙ୍କ ରାଜା 

 ହେଲେ ତୁମ ଯମରାଜ l

ଦେବାଦେବୀଙ୍କର ଅଗ୍ରରେ ପୂଜିତ 

  ମାତାଶ୍ରୀ ପାର୍ବତୀ ସୁତ 

ଦନ୍ତଭାଙ୍ଗି ତୁମେ ଲେଖି ଦେଇଥିଲ 

  ବ୍ୟାସଙ୍କ ମହାଭାରତ l

ହେ ସୃଷ୍ଟି ରକ୍ଷକ ଜୀବନ ନାବିକ 

  ତୁମେ ଥିଲେ ସବୁ ଜୟ 

ସକଳ ପୂଜାର ତୁମେ ଆଦ୍ୟ ଧୂପ 

  ବକ୍ରତୁଣ୍ଡ ମହାକାୟ l

ସଞ୍ଜ ଆଳତିରେ ପ୍ରାର୍ଥନା ସଭାରେ 

  ତୁମେ ହିଁ ପ୍ରଥମ ଶ୍ଳୋକ 

ସବୁ ଆରମ୍ଭର ତୁମେ ହିଁ ନାୟକ 

  ଆହେ ମହା ବିନାୟକ l

ଦିଅ ଦିବ୍ୟ ବୁଦ୍ଧି ଦିଅ ଦିବ୍ୟଜ୍ଞାନ 

  ଲଡୁପ୍ରିୟ ଗଣପତି

ତୁମେ ଶୁଭଶାନ୍ତି ବିଦ୍ୱାନ ମୂରତି 

  ତୁମ ବିନୁ ନାହିଁ ଗତି l

ଜ୍ଞାନର ସାଗର ବିଦ୍ୟାର ଭଣ୍ଡାର 

 ଘେନ ପ୍ରଭୁ ମୋ ପ୍ରଣତି 

ସକଳ ଶକ୍ତିର ତୁମେ ହିଁ ଆଧାର 

 କୋଟିସୂର୍ଯ୍ୟ ତୁମ ଜ୍ୟୋତି l