ସ୍ୱାଧୀନତା ଦିବସ

ସ୍ୱାର୍ଥ ଅଳନ୍ଧୁରେ ରଙ୍ଗହୀନ ଆଜି 

   ଏ ସ୍ୱାଧୀନତା ଦିବସ 

ଲୋକ ଦେଖାଣିଆ ଉତ୍ସବ ପାଳନ 

   ମୁହଁରେ କୁଟିଳ ହସ l

ହିଂସା ପ୍ରତିହିଂସା ଛଳନା ଗନ୍ଧରେ 

  ଆମେ ତ ଅଣନିଶ୍ୱାସୀ 

ଆଗ ଭଳି ଆଉ ଅଗଷ୍ଟ ପନ୍ଦର 

   ଆଣୁ ନାହିଁ ହସଖୁସି l

ମଣିଷ ପଣିଆ ନାହିଁ ଏ ସମାଜେ 

   ସଭିଏଁ ତ ସ୍ୱାର୍ଥପର 

ଆପଣା ସ୍ୱାର୍ଥରେ ସର୍ବେ ମସଗୁଲ

  କେହି ନୁହଁନ୍ତି କାହାର l

ଦୁର୍ନୀତିର ରଙ୍ଗ ସବୁଠାରେ ବୋଳା 

   ପଲ୍ଲୀରୁ ଦିଲ୍ଲୀ ପର୍ଯ୍ୟନ୍ତ 

ବଡ଼ବଡ଼ିଆଙ୍କ ହୀନ ଚକ୍ରାନ୍ତରେ

    ଗରିବଟା ହନ୍ତସନ୍ତ l

ସ୍ୱଚ୍ଛତା ଏଇଠି କାଗଜ କଲମେ 

   ନୀଳ ବର୍ଣ୍ଣର ଶୃଗାଳ 

ଗାଆଁ ରୁ ସହର ସବୁଠି ଚାଲିଛି

   ତୁଚ୍ଛ ରାଜନିତି ଖେଳ l

ନୈତିକତା ଶୂନ୍ୟ ଆଜି ଏ ଦିବସ

   ନାହିଁ ଆଉ ଭାଇଚାରା 

ସ୍ୱାଧୀନତା ଏଠି ଗୁମୁରି କାନ୍ଦୁଛି 

  ହୋଇ ଗୋଟେ ବେସାହାରା l

ନାରୀ ସ୍ୱାଧୀନତା ପ୍ରହସନ ଆଜି 

   ଭାଷଣ ବାଜିରେ ସାର 

ବିକାଶ ଏଇଠି ଅଧ ପନ୍ତରିଆ 

   ଯୋଜନା ପାଣିରେ ଗାର l

ଚୋରି ଡକାୟତି ହତ୍ୟା ମାରପିଟ୍

   ରଚେ ନିତି ବର୍ବରତା 

ମିଛ ଅନ୍ଧାରରେ ହଜି ତ ଯାଇଛି 

   ଆଜି ଆମ ସ୍ୱାଧୀନତା l

ସମର୍ପିତ ମନେ ଦେଶପାଇଁ ଆମେ 

    କରିବା ଆସ ଶପଥ

ଦେଶ ସେବା କରି ଏ ଜୀବନ ଦେବା

   ଉଡାଇ ବିଜୟ ରଥ l