ଆଇ ଆମ୍ ଭେରି ସରି

ରାସ୍ତାରେ ପଡ଼ିଛି  ରକ୍ତ ଜୁଡୁ ବୁଡୁ

          ଆମରି ପରିକା ତରୁଣୀ ଟିଏ ,

ଦେଖୁଛନ୍ତି ସର୍ବେ କେହି ନ'ଉଠାନ୍ତି

           ସକାଳୁ ପଡ଼ିଛି ବାରଟା ଯାଏ ।

ଚଢ଼ି ଯାଇଅଛି ଗାଡ଼ି ତା' ଉପରେ

        ବୋହୋସ ପରିକା ପଡ଼ିଛି ସିଏ ,

ମେଳା, ମେଳା ଲୋକ ଘେରି ରହିଛନ୍ତି

         ପାଣି ଟୋପେ ମଧ୍ୟ ନ'ଦିଏ କିଏ ।

ଦୁଇ ଖଣ୍ଡ ହୋଇ ଶରୀର ପଡ଼ିଛି

       ମାଆ, ମାଆ ବୋଲି ଧୀରେ ଡାକୁଛି ,

ଉପର ଭାଗଟି  ଚିତ୍କାର କରୁଛି

          ବଞ୍ଚିବା ଲାଗି ସଙ୍ଘର୍ଷ କରୁଛି ।

ସ୍କୁଟି ପଡିଅଛି ଦୁଇ କୋଶ ଦୂରେ

        ଘୋଷାଡି ନେଇଛି ଚକାର ତଳେ ,

କେହି'ତ ନାହାନ୍ତି ଟ୍ରକର ଭିତରେ

        ଚାଳକ ଫେରାର ବୁଦ୍ଧିର ବଳେ ।

 ଦଳେ ଲୋକ ଆସି  ସେଠାବେ ପହଞ୍ଚି 

        ପଚାରିଲେ ଚଢ଼ି ଗଲାକି ଗାଡ଼ି??

କିପରି ଏ ' ଝିଅ  ଗାଡ଼ି ଚଢୁଥିଲା ??

        ଟ୍ରକ୍ ଚକା ତଳେ ଗଲା ସେ' ପଡ଼ି !!

ଅନୁସନ୍ଧାନ କରି କହିଲେ ସର୍ବେ

          ନିଶ୍ଚୟ ପୋଲିସ କେଶ୍ ହୋଇବ ,

ଖବରଦାର୍ କେହି ଛୁଇଁବ'ତ ନାହିଁ

        ନ'ହେଲେ ପୋଲିସ ଝାମେଲା ହେବ ।

କିଛି କ୍ଷଣ ପରେ ପୋଲିସ୍ ଆସିଲା

           ଆଖି କାଢ଼ି କରି ଚିତ୍କାର କଲା ,

କାହିଁକି ଏଠାରେ ଭିଡ ଜମେଇଛ ?

         ହୋ'ହାଲ୍ଲା କାହିଁକି କରୁଛ ଭଲା ।

ସବୁ ହଟିଯାଅ  ଫଟୋ ଉଠାଯିବ

         ତାପରେ ତଦନ୍ତ ହୋଇବ ଯାଇଁ ,

ନିର୍ଦ୍ଦେଶ ମତରେ ସାମ୍ବାଦିକ ଭାଇ

         ଲେଖିଲେ ଖବର ଛାପିବା ପାଇଁ ।

ଫଟୋ ଉଠା ଭାଇ ଫଟୋ ଉଠାଇଲା

          ଝିଅଟି କୁନ୍ଥେଇ ଆଖି ଠାରଇ ,

ଶୋଷରେ ତଣ୍ଟିଟା ଶୁଖି ଯାଉଅଛି

          ପାଣି ମୁନ୍ଦେ ଦିଅ ବୋଲି ମାଗଇ ।

ପାଣି ଦେଲେ କେହି କେଶ୍ ରେ ଫସିବ

        ରଡ଼ି ଦେଲା ସେହି ପୋଲିସ ଭାଇ ,

ଆମ୍ବୁଲାନ୍ସ ଡ଼ାକି ଚଢ଼େଇ ଦେଲା'ସେ

         ତଳେ ପଡିଥିବା ଝିଅକୁ ନେଇ।

ଡ଼ାକ୍ତରଖାନା'ରେ ଡାକ୍ତର ବାବୁଟି

        ପଚାରିଲେ ସବୁ ଘଟଣା ଯାକ ,

ସବୁ ଶୁଣି ପୁଣି କହିଲେ ଡାକନ୍ତୁ

         ତାଙ୍କ ପରିବାର ନିଜର ଲୋକ ।

ବିନା ଦସ୍ତଖତେ ଅପରେସନ'ଟା

       କିପରି କରିବା କୁହନ୍ତୁ କେହି ??

ଦାୟିତ୍ଵ କେ' ନେବ ଦାୟୀ କିଏ ହେବ ?

       କହି ଅକ୍ସିଜେନ୍ ଦେଲେ ଲଗେଇ ।

କିଛି କ୍ଷଣ ପରେ ଧୀର ହୋଇଗଲା

       ନିସ୍ତେଜ୍ ହୋଇଲା ଝିଅର ଶରୀ ,

ଡାକ୍ତର କହିଲେ ବିଳମ୍ବ ହୋଇଲା 

      ଏଠାକୁ ଆଣିବା ହୋଇଲା ଡେରି ।

 ଆଇ ଆମ୍ ଭେରି ସରି ......

ଆଇ ଆମ୍ ଭେରି ସରି......

ଇଉନିଅନ୍ ନେତା ଆସିଲେ ସର୍ବେ

       ଶବ ବିଷୟରେ ଦେଲେ ଭାଷଣ ,

କ୍ଷତି ପୂରଣର ପ୍ରଦାନ ଦାବିରେ

      ଉଚ୍ଚ ସ୍ଵରେ ଦେଲେ କେତେ ସ୍ଳୋଗାନ ।

ଦୁଇ ଖଣ୍ଡ ହେଇ ଶବ ପଡ଼ିଅଛି

      କେହି ପାରିଲେନି ତାହାକୁ ଯୋଡ଼ି ,

ଶବ ପଡ଼ି ପଚା ଗନ୍ଧ ଉଠିଲାଣି

      ରାଜନୀତି ଯୋଗୁଁ ନ'ହୁଏ ପୋଡ଼ି ।

କାହାର ଝିଅ ସେ' କେଉଁଠି ତା' ଘର

       ସବୁ କିଛି ଯାଇଥିଲା'ତ ସରି ,

ସଭିଏଁ ଖସିଲେ ଯିଏ ଯାହା ବାଟେ

        ନଥିଲା ଉତ୍ତର ମୁଖେ କାହାରି  ।

ଡାକ୍ତର ପାଟିରୁ ଅସ୍ପଷ୍ଟ ଶବ୍ଦଟା

      ଚାପା ଧୀର ସ୍ଵରେ ହେଲାତ ବାରି ,

ପୋଷ୍ଟମର୍ଟମ ଟା' କରେଇ ଦିଅନ୍ତୁ

      ପରିବାର ଲୋକ ନାହିଁ ତାହାରି ।

 

ଆଇ ଆମ୍ ଭେରି ସରି......

ଆଇ ଆମ୍ ଭେରି ସରି.....