ଆଗକୁ ଯିବାର ନାଁ ଜୀବନ

ଏତେଦିନ ଧରି

ଏତେକଥା ଶୁଣି ସାରିଲା ପରେ

ଆଖିରେ ଆଖିଏ ରଙ୍ଗ

କାହିଁକି ବୋଳିଦେଲି କେଜାଣି,

ଜୀବନକୁ ଆଉ କେତେବା ଦେଖିଥାନ୍ତି

ଆଉ କାହାର ଚାଟୁବାକ୍ୟ 

କାହିଁକି ବା ଶୁଣିଥାନ୍ତି

ଜୀବନ ତ ମୃତ୍ୟୁର ଦିଗରେ 

ଧାଉଁଛି ପ୍ରତିକ୍ଷଣ,

ତାହେଲେ ବଞ୍ଚାଅ ବଞ୍ଚାଅ ବୋଲି

ଚିତ୍କାର କରିଥାନ୍ତି କାହିଁକି ଯେ I

ଯୌବନର ନିଆଁ କାଲି ଜଳୁଥିଲା

ଆଜି ସବୁ ନିରବ ନିଥର

ଉପଭୋଗର କଥା ନିତି କହୁଥିବା

ମଣିଷଟିର ନିରବି ଯାଇଛି ସ୍ୱର,

ସମୟ ସହ ପଦ ମିଶାଇ 

ଚଲି ନ ପାରିଲେ ତ 

ସମସ୍ତେ କହିବେ ପଳାୟନ ପନ୍ଥୀ I

ସେଥିପାଇଁ ତ କହୁଛି

ଅଭିଯୋଗ କରନି

ଅବସୋସ ରଖନି

ଜୀବନ ରାସ୍ତାରେ 

ଆଗକୁ ଆଗକୁ ମାଡିଚାଲ

ଯାତ୍ରା କେବେ ତ ସରିବ ନିଶ୍ଚୟ

ପଥଚଲା କ୍ଳାନ୍ତି ନ ଭେଗିଲେ ହେଲା I