ଆ ଆ ରେ ବଣି ଚଢେଇ

ଆ ଆ ରେ ବଣି ଚଢେଇ

ଆ ମୋ ପାଖକୁ ଆ।

ମତେ ଦେଖି କିଆଁ ଯାଉ ପଳେଇ

କହିବୁ ଟିକିଏ ଆ ।

ତୁ ତ ଟିକି ମୁଁ ତ ଟିକି ଡରୁଚୁ

ମତେ କିଆଁ ?

ପାଖକୁ ତୋର ଗଲେ ମୁଁ ଚାଲି

ମାରୁଚୁ କିଆଁ ଡିଆଁ ?

କେତେ ଛୋଟିଆ ଗୋଡ ତୋହର

ଡେଇଁ ଡେଇଁ ତୁ ଯାଉ ।

କହିବୁ ମତେ କୋଉଠି ରହୁ

କଅଣ ତୁଉ ଖାଉ ?

ଆ ମୋ ପାଶେ ଆଉଁଷି ଦେବି

ଗେଲ କରିବି ଧରି ।

ଚୁଡା ମୁଢି ତୋ ଖାଇବା ଲାଗି

ଦେବି ଯତନ କରି ।

ଖାଇ ସାରିଲେ ପିଇବୁ ପାଣି

ଖେଳିବା ଆମେ ଖେଳ ।

ଫୁର୍ କିନି ଉଡେଇ ଦେବି

ଘରକୁ ଯିବୁ ତୋର ।

ବଣି କହିଲା କୁନାରେ କୁନା

ଯାହା କହୁଚୁ କହ ।

ତତେ ମୁଁ କେବେ ନ ଦେବି ଧରା

ତୁଉ ମଣିଷ ପୁଅ ।

ଟିକି ପିଲା ତୁ ହେଲେ ମୋହର

ବିଶ୍ବାସ ଟିକେ ନାହିଁ ।

ଧରିଲେ ମତେ ହାତରୁ ତୋର

ମୁକତି ମୋର ନାହିଁ ।

ଥଟ୍ଟା ମଜାରେ ମଣିଷ ଜାତି

ଖେଳନ୍ତି ଆମ ସହ ।

ଜୀବନ କେବେ ନିଅନ୍ତି ଆମ

ସତ କି ମିଛ କହ ।

ମୋ କାମରେ ଯାଉଛି ମୁଁ

ତୋ କାମେ ତୁ ଯାଆ ।

ସବୁ ମଣିଷ ଭଲ ହୁଅନ୍ତୁ

ବାରତା ଦେଇ ଆ ।