विषय: ओवी सावित्रीची
विषय: ओवी सावित्रीची
पहिली माझी ओवी गं
ज्योतिबांच्या सावित्रीला
पतीसवे समाजकार्यात
सहभाग हिरीरीने घेतला ||१||
दुसरी माझी ओवी गं
फुल्यांच्या पत्नीला
पतिकडून शिक्षणाचा
पहिला पाठ तिने गिरवला ||२||
तिसरी माझी ओवी गं
ज्योतिबाच्या सावलीला
पतीचे शिक्षण कार्य पूर्णतः
तडीस नेणा-या माऊलीला ||३||
चौथी माझी ओवी गं
ख-या त्या ज्ञानज्योतिला
बालिंकांना देऊन शिक्षण
घरोघरी ज्ञानदीप लाविला ||४||
पाचवी माझी ओवी गं
क्रांतिज्योती सावित्रीला
अज्ञान अंधश्रद्धांशी लढा देत
दगड शेणाचा वार साहिला ||५||
सहावी माझी ओवी गं
स्रियांच्या भाग्यदात्रीला
गुलामीच्या तोडून शृंंखला
स्वाभिमान जागृत करविला ||६||
सातवी माझी ओवी गं
दत्तक यशवंताच्या आईला
पिडीत मातांच्या मुलांसाठी
अनाथाश्रम जिने चालविला ||७||
आठवी माझी ओवी गं
लक्ष्मीबाईच्या सुकन्येला
आत्महत्या,भ्रृणहत्या रोखून
केलं सुरक्षित गर्भासह मातेला ||८||
नववी माझी ओवी गं
अष्टपैलू त्या व्यक्तिमत्त्वाला
ज्ञानाई,स्फूर्तीनायिका,लेखिका
गृहिणी नि समाजसुधारकाला ||९||
कित्येक करीन ओव्या गं
स्री शिक्षणाच्या प्रणेतीला
अज्ञानरूपी अंध:कारातून
ज्ञानप्रकाशमार्ग देवविला ||१०||