तो ठिपका

एक ठिपका प्रकाशाचा आला 

मिट्ट अंधाराला भेदत

राहिला घट्ट उभा अचल

डोळे घट्ट झाकून घेतले

अडवण्याचा केविलवाणा प्रयत्न

तो तितकाच हट्टी जाईना मुळी

सारे दरवाजे बंद मग आल़ा कुठून

की आहे तिथे तो शुष्क कोपरा 

थेंबाच्या आवाजालाही आसावलेला

नकोच होती त्याची ही घुसखोरी

की होतच त्याचेअस्तित्व कायम तिथे

पटलावरच्या आवरणाला ठेवलेल्या 

छिद्राएवढेच अंतर होते ते

ऐलतीरावरुन पैलतीरावर पोहोचण्याकरता

मोह नव्हता पाशातही अडकणार नव्हते

तरी ध्यास लागलाच ना

धडपडत अडखळत

त्या ठिपक्या पलीकडचे शोधण्याकरता

हलक्याफुलक्या फुंकरीचा आधारच मिळाला जसा मिटलेली कळी खुलायला

आणि स्वतःच अडकलेला तो भ्रमर 

निघाला परत जीवन रस शोधायला