तीज (पोवारी कविता)

भया   रहेती   पुर्वज 

येन  गरमीमा  प्यासा |

तृप्त   करन   उनला

भर   सेजन   करसा ||१||

साढ़े   तिन   मुहूर्तमा

एक   मुहूर्त  से  तीज |

कामकाज किसानीका

सुरु   करसेती    अज ||२||

परशुरामको      जन्म 

आय  तीजको  दिवस |

महा भारत    लिखनो

सुरु  करीतीन   व्यास ||३||

तीजलाच    पृथ्वीपर

गंगाजीको   आगमन |

त्रेता   युग    सुरुवात 

होतो  अजकोच दिन ||४||

येन   दिन  सुदामा न्

पोहा  कृष्णला  देईस |

बदलामा    अविनाशी

धन   दौलत   पायीस ||५||

कृष्ण अक्षयको  पात्र

देसे   तीजको  दिवस |

शांतीलका    पांडवन्

गुजारीन      बनवास ||६||

पुंजी  पुण्यकी बढाओ 

करो     वृक्ष    संवर्धन |

पाणी प्यासोला पिवावो

देवो   प्राणीला   जीवन ||७||