थेंब

नाजुकशा पाकळीवरचा थेंब

दाखवत होता आपला तोरा

हेलकावे देताना त्याला

काळजी घेत होता वारा

सुंदरसा तो थेंब

होता हे जाणून

त्याच्यामुळेच फूल ते

दिसत होते खुलून

कौतुकापुढे आपुल्या

कळत नव्हते काही त्याला

हिणवत होता तो

मातीत पडणाऱ्या थेंबाला

बघत होता शेजारचा थेंब

त्याचं हे असलं वागणं

कठीण नव्हतं त्याच्यासाठी

थेंबाला त्या समजावून सांगणं

मातीतल्या त्या थेंबामुळेच

उगवलंय हे फूल आज

खरं कौतुक त्याचंच आहे

करु नको तू उगा माज

ऐकून हे बोलणं

ओशाळला थेंब तो

कोणात कमी नाही हे

चांगलं समजून चुकला तो..